Forma e shkëlqyer e Edon Zhegrovës tërheq vëmendjen në Itali, paralajmërohet kthesa e madhe

Paraqitjet e fundit të Edon Zhegrovës nën fanellën e Kombëtares së Kosovës kanë bërë bujë në Itali, duke u shndërruar në qendër të vëmendjes për opinionin sportiv atje. Një nga mediumet më të njohura italiane i ka kushtuar një hapësirë të veçantë yllit kosovar, duke analizuar ecurinë e tij të deritanishme dhe ndikimin që mund të ketë në ekipin e tij. Edhe pse Kosova u mposht me rezultatin 3:1 në përballjen ndaj Austrisë, Zhegrova u hodh në fushë në pjesën e dytë dhe arriti të lërë gjurmë duke shënuar golin e vetëm për “Dardanët” përmes një goditjeje nga pika e bardhë. Pavarësisht epilogut të ndeshjes, analistët italianë vlerësuan lart formën e ëmbël në të cilën po kalon sulmuesi, i cili tashmë ka kapur shifrën e tre golave dhe një asistimi në gjashtë paraqitjet e para këtë sezon. Sipas vlerësimeve nga Italia, ky paraqitje shërben si një sinjal i qartë për trajnerin Luciano Spalletti, i cili gjatë edicionit të kaluar nuk pati mundësi të mbështetej vazhdimisht te potenciali i plotë i Zhegrovës. Në shkrim theksohet gjithashtu se anësori kosovar pritet të fitojë më shumë hapësirë në skemat e trajnerit dhe do të jetë në garë direkte me Francisco Conceicaon për një vend titullari në formacionin bazë. Në sistemin e lojës 4-2-3-1, të preferuar nga shtabi teknik, Zhegrova shihet si opsion ideal për krahun e djathtë të repartit ofensiv, pozitë të cilën aktualisht e mbulon edhe Conceicao. Përpara se t'i rikthehet angazhimeve me klubin, vëmendja e Zhegrovës është plotësisht e përqendruar te përfaqësuesja. Të enjten, “Dardanët” do të matin fuqitë me Izraelin në Hungari, në kuadër të ndeshjeve të Ligës së Kombeve.