Përplasja e fortë/ Bardhi sfidon Ramën: Dil në shesh dhe jep llogari për Vlora Hysenin dhe aferat qeveritare

Kreu i Grupit Parlamentar të Partisë Demokratike, Gazment Bardhi, ka reaguar ashpër ndaj deklaratave të kryeministrit Edi Rama lidhur me situatën politike dhe institucionale në vend, duke i kërkuar llogari publike për një sërë çështjesh të nxehta të qeverisjes. Në një fjalë të zgjeruar dërguar mediave, Bardhi u ndal me theks te emërimi i Vlorës Hyseni në krye të Shërbimit Informativ Shtetëror (SHISH). Pasi Rama përmendi se ajo kishte siguruar vlerësime maksimale nga partnerët ndërkombëtarë para marrjes së detyrës, deputeti demokrat e sfidoi kreun e qeverisë që t'i bëjë publikë emrat e tyre. “Dil dhe tregoju shqiptarëve cili shërbim i huaj, cili partner ndërkombëtar ta sugjeroi Vlora Hysenin me referencë të shkëlqyer dhe kush është shastisur nga veprimet ligjore të SPAK kundër krimeve të saj?”, u shpreh Bardhi, duke kërkuar gjithashtu sqarime rreth shkarkimit të saj të mëparshëm nga strukturat e sigurisë në Kosovë me vendim të kryeministrit Albin Kurti dhe presidentes Vjosa Osmani. Më tej, ai ngriti pikëpyetje të forta edhe për raportet e dyshuara të Hysenit me personin nën hetim, Ergys Agasi. “Kush e vuri Vlora Hysenin në shërbim të Ergys Agasit? A keni një përgjigje, zoti Kryeministër?”, pyeti ai, duke shtuar se opozita i kishte ngritur këto shqetësime edhe më herët në Kuvend pa marrë një verifikim zyrtar nga ekzekutivi. Kryetari i grupit parlamentar të demokratëve adresoi gjithashtu qëndrimet e Ramës ndaj zyrtarëve të prekur nga drejtësia, duke përmendur rastet e dekriminalizimit, ish-ministrit Saimir Tahiri, si dhe koncesionet në shëndetësi dhe inceneratorët. Duke u ndalur tek impianti i mbetjeve, ai e akuzoi hapur kryeministrin si garantues të skemës korruptive që i kushtoi miliona euro buxhetit të shtetit. “A nuk ishe ti Edi Rama garant që inceneratorët ekzistonin, punonin dhe digjnin çdo ditë plehrat e shqiptarëve? A nuk ishe ti që firmose 17 vendime brenda ditës për t’i hapur rrugë një skeme që i kushtoi shqiptarëve 340 milionë euro?”, deklaroi ndër të tjera Bardhi. Në fokus të kritikave të tij ishin edhe tenderat e AKSHI-t, projekti i KAYO-s, Porti i Durrësit, Tuneli i Llogarasë dhe Aeroporti i Vlorës. Bardhi kërkoi llogari se si u përzgjodhën partnerët dhe kompanitë për këto investime strategjike, duke përmendur rastin e investitorit Alabari dhe procedurat e ndjekura për kompanitë turke. Në mbyllje të deklaratës, Bardhi denoncoi edhe presionet e ushtruara nga qeveria ndaj medias, duke përmendur sulmet ndaj ekraneve të Syri TV dhe News 24, dhe theksoi se një kryeministër i përgjegjshëm nuk përdor shantazhin kundër lirisë së fjalës.