Tensionohet situata para Kryeministrisë: Hedhje molotovësh dhe ndërhyrje e forcave të rendit

Gjatë tubimit të zhvilluar në bulevard para Kryeministrisë, situata ka eskaluar kur një grup protestuesish onë hedhur mjete piroteknike dhe molotovë në drejtim të ndërtesës qeveritare dhe mjeteve të blinduara të policisë. Forcat e rendit janë kundërpërgjigjur menjëherë duke përdorur gaz lotsjellës dhe autobotët me ujë për të shpërndarë turmën. Nëpërmjet sistemeve të transmetimit audio në terren, autoritetet policore u kanë bërë thirrje të vazhdueshme pjesëmarrësve të distancohen nga aktet e dhunës dhe të shmangin përplasjet. Policia ka theksuar se individët e përfshirë në akte vandale janë identifikuar dhe do të mbajnë përgjegjësi penale para ligjit. Perimetri i sigurisë rreth institucionit është rrethuar nga një numër i madh efektivësh të forcave speciale, të mbështetur nga dy autobotë ujëhedhës, njëri prej të cilëve ka hyrë në funksion për të vënë nën kontroll turmën e tensionuar. Megjithatë, ndryshe nga ditët e kaluara, kjo protestë që shënon ditën e saj të 19-të ka nisur kryesisht e qetë. Kushtet atmosferike, konkretisht reshjet e shiut, kanë ndikuar dukshëm në uljen e numrit të të rinjve të pranishëm në shesh.