A do ta pranonte një shans të dytë nga Arbenita? Fero thyen heshtjen dhe flet hapur për marrëdhënien e re me ish-bashkëshorten

Reperi i njohur Fero është rikthyer në vëmendjen e publikut për të diskutuar rreth raporteve aktuale me ish-partneren e tij, modelen e njohur Arbenita Ismajli, duke hedhur dritë mbi dinamikat e reja mes tyre pas një të kaluare të tensionuar. Gjatë një paraqitjeje televizive në emisionin “Live me Luizin” në Top Channel, artisti u pyet mbi komunikimin që mban sot me nënën e fëmijës së tij, ku konfirmoi se tashmë kanë vendosur një urë komunikimi dhe bashkëpunimi, sidomos për edukohen dhe rritjen e vajzës së tyre, Ninës. “Unë sot gëzoj një raport shumë të mirë me ish-bashkëshorten time, nënën e vajzës sime. Gëzojmë një raport shumë të mirë, kemi një komunikim shumë të mirë për vajzën. Si unë, ashtu edhe ajo, kemi mendimin që – momentalisht, sepse kur je i ri, gabon ajo, gaboj unë; kush i ka gabimet dhe fajet, i di më mirë vetë çifti – por sot gëzojmë një raport të mirë dhe duam që ta ruajmë këtë raport për hir të vajzës, sepse vajza është duke u rritur”, u shpreh reperi gjatë bisedës në studio. Moderatori i njohur Luiz Ejlli nuk ngurroi ta sfidonte me pyetje të tjera, duke i kërkuar një reflektim se çfarë do të ndryshonte nëse do të mund ta kthente kohën pas në romancën e tyre të dikurshme. Duke pranuar se pjekuria vjen me kalimin e viteve, Fero theksoi se gabimet janë të pashmangshme dhe se shpesh duhet t'i përjetosh ato vetë për të kuptuar të vërtetën e situatave. “Tani mund të them se nuk do ta bëja këtë, nuk do ta bëja atë, por ndonjëherë, për ta kuptuar që je gabim, duhet ta kalosh gabimin. Ka shumë gjëra që do të kisha dëshirë të kishin ndodhur ndryshe, por janë pjesë e jetës. Ne jemi njerëz dhe gabojmë. Nuk besoj se ka njeri që nuk gabon”, deklaroi ai pa doreza. Ndarja e Feros dhe Arbenita Ismajlit ka qenë ndër ngjarjet më të komentuara në mediat rozë dhe rrjetet sociale, e shoqëruar shpesh me akuza të ndërsjella, debate publike dhe procese ligjore lidhur me kujdestarinë e vajzës. Në të kaluarën, modelja kishte ngritur pretendime për dhunë psikologjike e fizike si dhe probleme të tjera në çift, akuza të cilat ishin mohuar nga ana e reperit. Megjithatë, dalja e fundit publike tregon se palët kanë lënë pas armiqësinë për hir të së ardhmes së fëmijës.