Analisti Çupi: Lëvizja e Berishës po dështon, opozita rrezikon përplasje të rënda të brendshme

Protesta e fundit e opozitës është pjesë e një skenari të paramenduar për të nxitur tension dhe konflikt zinxhir, jo vetëm me rendin ligjor dhe institucionet, por edhe në radhët e vetë forcave opozitare. Ky është qëndrimi i mbajtur nga analisti Frrok Çupi gjatë një paraqitjeje televizive në ABC News, ku u ndal te dinamikat dhe prapaskenat e tubimit. Sipas Çupit, Partia Demokratike po kalon një fazë të vështirë mbështetjeje dhe është përfshirë në një garë të sforcuar për të mbledhur numra. Ai vuri në dukje se mungesa e Sali Berishës në protestë tregon qartë se ai është shndërruar në një figurë të papranueshme edhe brenda tubimit të tij, duke e cilësuar atë si "non grata" në aktivitetin e organizuar nga vetë mbështetësit e tij. Duke analizuar gjendjen aktuale të PD-së, analisti theksoi se mungesa e kapaciteteve për të tërhequr qytetarët në shesh po e shtyn këtë forcë drejt luftës së brendshme për mbijetesë dhe eliminim politik. Ai paralajmëroi se përshkallëzimi i kësaj situate dhe përdorimi i dhunës mund të sjellë pasoja të rënda dhe incidente të dhunshme mes grupeve rivale brenda opozitës. Në përmbyllje të analizës së tij, Çupi u ndal te mbështetja e ngushtë që i ka mbetur ish-kryeministrit Berisha, duke e kufizuar atë vetëm te rrethi i ngushtë familjar dhe grupet e ashtuquajtura të tensionit. Ai u bëri thirrje aktorëve politikë të tregojnë kujdes, pasi vazhdimimi i këtyre skenarëve të konfliktit mund të prodhojë pasoja dhe viktima mes vetë palëve në konflikt.