Musliu shkrep foton nga Kuvendi: 16 shtatori dëshmoi krizën e thellë dhe mungesën e guximit politik

Deputetja e Partisë Demokratike të Kosovës, Ganimete Musliu, ka ngritur shqetësimin se vendi po kalon një fazë të rëndë të krizës në udhëheqjen shtetërore, duke e ndërlidhur këtë situatë me zhvillimet dhe reagimet pas vendimit gjyqësor ndaj ish-krerëve të UÇK-së në Hagë. Përmes një imazhi të shpërndarë nga salla e Kuvendit të Kosovës, Musliu ka theksuar se data 16 shtatori, e cila shënoi shpalljen e aktgjykimit ndaj ish-udhëheqësve të UÇK-së, ka reflektuar hapur atë që ajo e ka quajtur si “boshllëk i madh politik” brenda vendit. “16 shtatori nuk nxori në pah vetëm një aktgjykim. Nxori në pah edhe boshllëkun e madh politik që po e përjeton Kosova. Përballë një momenti historik, kur duhej guxim, qëndrim, vizion dhe përgjegjësi, shumëkush zgjodhi heshtjen, kalkulimin dhe rehatinë politike”, ka shkruar Musliu në reagimin e saj. Më tej, ligjvënësja ka vënë në shënjestër strukturën aktuale udhëheqëse, duke pohuar se në vend të veprimeve konkrete dhe drejtimit të duhur, po preferohet fshehja pas fjalëve dhe gjetja e justifikimeve. “Sot kemi një klasë politike që në vend të udhëheqjes shpesh kërkon strehë pas deklaratave; në vend të vendimeve kërkon arsyetime; e në vend të guximit politik zgjedh heshtjen”, ka deklaruar ajo. Duke e quajtur këtë zhvillim si një “krizë të thellë të përgjegjësisë politike”, ajo ka shtuar se ngjarjet e 16 shtatorit e kanë bërë të pamundur fshehjen e kësaj realiteti pas mbulesave sipërfaqësore. “Kosova ka nevojë për politikanë që kur vendi përballet me momentet më të vështira nuk matin koston e karrierës së tyre, por matin peshën e përgjegjësisë ndaj Kosovës. Historia nuk i mban mend ata që heshtën kur duhej të flisnin. I mban mend ata që patën guximin të qëndrojnë”, ka përfunduar Musliu.