PDK kërkon veprime urgjente pas miratimit të deklaratës për UÇK-së: Radhën e kanë ndryshimet ligjore në Hagë

Partia Demokratike e Kosovës ka mirëpritur vendimin e Kuvendit të Kosovës për miratimin e deklaratës kushtuar aktgjykimit të Dhomave të Specializuara në Hagë kundër ish-udhëheqësve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Nëpërmjet një deklarate për media pas përfundimit të seancës, kjo forcë politike ka shprehur mirënjohjen për të gjitha grupet parlamentare për bashkëpunimin dhe mbështetjen e dhënë në përafrimin e përmbajtjes së nismës së saj. Sipas kësaj partie, përmes këtij akti institucioni më i lartë ligjvënës ka dëshmuar qartë mbrojtjen e vërtetësisë historike të luftës çlirimtare, duke shprehur njëkohësisht kundërshtimin ndaj vendimit të Gjykatës Speciale, të cilin kjo parti e konsideron të padrejtë. “Ky është një hap i rëndësishëm i vullnetit të përbashkët politik. Tani ai vullnet duhet të kthehet në veprim konkret”, theksohet në komunikatën zyrtare të partisë. Tutje, PDK-ja ka shtruar kërkesën që hapi i ardhshëm të jetë trajtimi i Projektligjit për ndryshimin dhe plotësimin e Ligjit për Dhomat e Specializuara, nismë kjo e ndërmarrë nga vetë ata. “Radha është e Projektligjit për ndryshimin dhe plotësimin e Ligjit për Dhomat. Kërkojmë nga Qeveria që ta procedojë pa vonesë në Kuvend dhe nga të gjitha grupet parlamentare që ta trajtojnë e votojnë me urgjencë”, thuhet në deklaratë. Në optikën e partisë, ndërsa deklarata simbolizon qëndrimin politik të Kuvendit, miratimi i ndryshimeve ligjore do të përbënte hapin e domosdoshëm institucional për t'i dhënë përgjigje kërkesave të tyre. PDK-ja ka garantuar se do të mbetet e përkushtuar në mbrojtjen e pastërtisë së luftës së UÇK-së dhe në sigurimin e një procesi të drejtë gjyqësor për ish-krerët e saj.