Ndalimi i drejtorit të Spitalit të Mitrovicës: Policia dhe Prokuroria zbardhin detajet e rastit të dhunës në familje

Drejtori i Spitalit të Përgjithshëm në Mitrovicë, Gëzim Berisha, ka përfunduar në prangat e Policisë, pasi bashkëshortja e tij ka denoncuar në organet e rendit se është ballafaquar vazhdimisht me dhunë psikike prej tij. Çifti, sipas dëshmisë së saj, nuk jeton më bashkë prej disa muajsh. Konfirmimin zyrtar për këtë arrestim e ka dhënë zëdhënësi i Policisë për Rajonin e Prishtinës, Enis Pllana. Ai ka bërë të ditur se menjëherë pas denoncimit, i dyshuari është vënë në pranga dhe, në bazë të vendimit të prokurorit, është dërguar në qendrën e mbajtjes. Në ndërkohë, masën e ndalimit prej 48 orësh e ka konfirmuar zyrtarisht edhe zëdhënësja e Prokurorisë Themelore në Prishtinë, Kaltrina Shala. Ajo ka sqaruar se ky veprim u ndërmor me urdhër të prokurorit kujdestar, pasi drejtori i spitalit dyshohet se ka kryer veprën penale të dhunës në familje. “Ju konfirmojmë se me urdhër të Prokurorit kujdestar, është ndaluar për 48 orë personi me inicialet G.B., nën dyshimin për kryerjen e veprës penale ‘Dhuna në familje’, nga neni 248 i Kodit Penal të Republikës së Kosovës (KPRK)”, thuhet në përgjigjen e Shalës.