Noka nga protesta e PD: Rama të pranojë kërkesat e studentëve dhe të largohet menjëherë

Nga bulevardi “Dëshmorët e Kombit”, ku po mbahet tubimi i opozitës, deputeti i Partisë Demokratike, Flamur Noka, ka deklaruar se kreu i Qeverisë, Edi Rama, duhet t'i hapë rrugë plotësimit të kërkesave studentore dhe të dorëhiqet nga funksioni i tij. Gjatë një deklarate për mediat, Noka u shpreh se ekzekutivi nuk mund të qeverisë përmes forcës dhe se qytetarët tashmë e kanë refuzuar hapur këtë pushtet. “Të gjithë shqiptarët kanë vetëm një mesazh dhe ne si demokratë e përcjellim sot këtu, studentët që janë atje. Ka vetëm një mesazh: Edi Rama largohu, ti nuk mund ta mbash pushtetin me dhunë. Askush nuk të do më, askush nuk të mbështet më. Me dhunë policore e kanë tentuar edhe diktatorë të tjerë dhe ti e di secili është fundi. Ndaj edhe kjo është motoja mbi bazën e të cilës është thirrur kjo protestë e dytë kombëtare e PD, për të qenë në sinkron të studentëve, për t’i mbështetur studentët. Kërkesat e tyre duhet të respektohen, zëri i tyre duhet të dëgjohet. PD ka qenë dhe është dhe do të vazhdojë t’i mbështesë kërkesat e studentëve dhe studentët në protestën e tyre. Ne u mblodhëm këtu për të filluar protestën, tashmë protesta do të vijojë tek studentët atje tek sheshi ku ata nisën betejën,” u shpreh Noka. Duke iu përgjigjur pyetjeve lidhur me masat e rrepta ndaj dhunës gjatë tubimeve, ligjvënësi demokrat theksoi se kreu i kabinetit qeveritar nuk do të mund t'i bëjë ballë energjisë së brezit të ri. “Çaushesku u mundua të mbijetojë në pushtet me masa represive, dhe sot gjithkush e di fundin e tij. Ky popull e ka thyer murin e egër të diktaturës në ’90 dhe nuk ka mur që mund të ndërtojë Rama që mund të mbajë energjinë e studentëve dhe vrullin e qytetarëve për ndryshim. Shqiptarët sot kërkojnë shtet, janë të gjithë në këmbë,” përfundoi ai.