Skema e mashtrimit me 100 mijë euro: Arrestohen në flagrancë dy të rinj në Tiranë

Policia e Tiranës ka vënë në pranga dy të rinj, pasi dyshohet se kanë tentuar t'i zhvasin shumën prej 100 mijë eurosh një 64-vjeçari, duke përdorur një skemë mashtrimi përmes një platforme komunikimi online. Ndërhyrja e autoriteteve u finalizua përmes operacionit të koduar “Seen”, i cili u zhvillua nga specialistët e Seksionit për Hetimin e Krimeve Ekonomiko-Financiare në bashkëpunim të ngushtë me Forcën e Posaçme “Operacionale”, menjëherë pas kallëzimit të depozituar nga vetë viktima. Në pranga kanë rënë shtetasit E. K., 24 vjeç dhe O. B., 23 vjeç. Ata u kapën në flagrancë nga uniformat blu në momentin që po merrnin shumën prej 100 mijë eurosh nga 64-vjeçari. Sipas hetimeve paraprake, autorët kishin krijuar një profil të rremë në rrjetet sociale, duke përdorur identitetin e një personi të njohur për viktimën. Kjo taktikë u shërbeu atyre për të fituar besimin e tij dhe për ta bindur që të dorëzonin paratë. Ndërkohë, autoritetet policore bëjnë me dije se hetimet janë duke vijuar për të zbardhur plotësisht dinamikën e kësaj ngjarjeje, si dhe për të verifikuar nëse ka persona të tjerë të përfshirë në këtë rrjet mashtrimi. Në përfundim të veprimeve të para hetimore, materialet procedurale i janë përcjellë Prokurorisë për ndjekjen e mëtejshme ligjore.