Valë masive protestash në Itali: Përplasje të dhunshme në Romë e Torino, mbi një milion qytetarë në rrugë

Mbi 60 qytete anembanë Italisë u përfshinë të premten nga protesta masive kundër shtrenjtimit të kostos së jetesës dhe rritjes së buxhetit për armatime. Sipas vlerësimeve të Unionit Sindikal të Bazës, numri i pjesëmarrësve kaloi shifrën e një milioni, ndërsa Ministria e Brendshme italiane raportoi për 255 mijë demonstrues. Në këto tubime u bashkuan punëtorë, studentë, fermerë, pensionistë, familje të ndryshme dhe sindikata. Megjithëse pjesa më e madhe e manifestimeve rrodhën në mënyrë të qetë, mbrëmja solli një përshkallëzim të situatës në Romë dhe Torino, ku pati përleshje të drejtpërdrejta mes forcave të rendit dhe protestuesve. Në kryeqytet, një fraksion u shkëput nga turma pranë Koloseut, duke hedhur mjete të forta ndaj policisë dhe duke iu vënë zjarrin disa koshave të mbeturinave. Për të shpërndarë turmën, autoritetet përdorën topa uji. Tetë persona ranë në pranga pasi tentuan në mënyrë të përsëritur të çanin kordonët e sigurisë, ndërkohë që u raportuan edhe efektivë të lënduar. Edhe në Torino u desh ndërhyrja e policisë me autobotë uji ndaj demonstruesve që iu afruan perimetrit të sigurisë pranë prefekturës. Tensioni nuk mungoi as në Mestre dhe Vicenza, ku pati të lënduar në të dyja kampet, si mes protestuesve ashtu edhe mes efektivëve. Kërkesat kryesore të ngritura në sheshe lidheshin me rritjen e pagave përballë inflacionit, frenimin e çmimeve të qirave, faturave të energjisë dhe produkteve të shportës. Sindikatat vunë theksin te nevoja për investime më të larta në arsim dhe shëndetësi, duke kundërshtuar alokimin e fondeve shtesë për armatim. Kjo grevë e përgjithshme në Itali u koordinua njëkohësisht me një lëvizje ndërkombëtare të punonjësve portualë, të cilët kundërshtuan dërgimin e armëve përmes deteve dhe përfshirjen e porteve në konflikte të armatosura. Kësaj nisme iu përgjigjën mbi 100 porte nga 22 shtete të ndryshme. Ministri i Brendshëm, Matteo Piantedosi, u shpreh se shteti garantoi të drejtën e qytetarëve për të protestuar paqësisht, pavarësisht akteve të dhunshme të shkaktuara nga grupe të izoluara. Ndërkaq, ekzekutivi italian vendosi të zgjasë deri më 31 mars 2027 misionin e 500 ushtarakëve për ruajtjen e rendit në Milano, qytet ky që pak javë më parë u trondit nga akte vandalizmi dhe plaçkitjesh. Megjithatë, ndryshe nga ngjarjet e 17 tetorit, tubimi i kësaj të premteje në Milano u zhvillua në qetësi të plotë.