Nuk u mbijetoi plagëve: Ndërron jetë në QKUK personi i aksidentuar në Mitrovicën e Jugut

Një ngjarje rrugore e ndodhur ditë më parë ka përfunduar me fatalitet. Një mashkull kosovar ka humbur jetën si pasojë e lëndimeve të rënda të pësuara në një aksident trafiku, i cili kishte ndodhur më 24 tetor në rrugën "Ahmet Selaci" në Mitrovicën e Jugut. Sipas raportit 24-orësh të Policisë së Kosovës, viktima nuk ka arritur t'u mbijetojë plagëve dhe ka ndërruar jetë të mërkurën, më 30 tetor, rreth orës 03:43 të mëngjesit, në Qendrën Klinike Universitare të Kosovës (QKUK), ku po merrte trajtimin e nevojshëm mjekësor. Aksidenti në fjalë ishte regjistruar dhe raportuar në organet e rendit më 24 tetor, rreth orës 21:25. Me vendim të prokurorit të rastit, trupi i pajetë i viktimës është dërguar në Institutin e Mjekësisë Ligjore (IML) për kryerjen e obduksionit.