Kur Real Madridi ishte pranë transferimit të Lionel Messit: Zbulohen prapaskenat e bujshme

Miguel Ángel Portugal, 70-vjeçari me një të kaluar të pasur si ish-futbollist, trajner i Castillas, skaut dhe sekretar teknik i Real Madridit, ka bërë një rrëfim bujshëm për përditshoren spanjolle “AS”. Ai ka treguar se gjigantët madrilenë patën mundësinë reale që të siguronin shërbimet e Lionel Messit, në kohën kur ylli argjentinas ende nuk kishte firmosur kontratën e tij të parë profesionale me Barcelonën. “Erdhi një moment kur mund të tentonim ta merrnim. Ai ende nuk kishte kontratë profesionale me Barcelonën dhe rinovimi po vononte. Një person i afërt me të ia ofroi Real Madridit”, – ka deklaruar Portugal gjatë rrëfimit të tij. Më tej, ai ka sqaruar se pavarësisht pasigurisë rreth vërtetësisë absolute të ofertës, sinjalet kishin mbërritur në zyrat e klubit mbretëror, duke krijuar madje edhe një kontaktesh paraprake mes palëve të interesuara. “Nuk e di nëse ishte e vërtetë apo jo, por në klub mbërriti informacioni se mund ta tentonim transferimin. Mundësia ekzistonte. Nuk deshëm të prishnim marrëdhëniet me Barcelonën, por pati një afrim. Gjithsesi, për respekt ndaj tyre, mendoj se marrëveshja nuk do të ishte realizuar”, – ka përfunduar ai. Gjatë prononcimit të tij, ish-drejtuesi i njohur është ndalur edhe te talente të tjera të mëdha që kanë qenë në shënjestrën e skautëve të Real Madridit ndër vite, duke përmendur emra si Neymar, Philippe Coutinho, Toni Kroos, Luka Modrić dhe Robinho.