Thirrje për drejtësi: Sot vijon protesta kombëtare për Arlindën dhe gratë e vrara, paralajmërohet bllokimi i institucioneve

Lëvizja qytetare kundër dhunës ndaj grave po merr përmasa të reja. Kolektivi për Mendim dhe Veprim Feminist ka bërë me dije se këtë të shtunë, duke filluar nga ora 17:00, do të riniset protesta mbarëkombëtare për të kërkuar vendosjen e drejtësisë për Arlindën dhe për të gjitha gratë që kanë humbur jetën si pasojë e femicidit. Përmes një komunikate për mediat, ky organizim u ka bërë thirrje qytetarëve për një pjesëmarrje sa më masive, duke nëvizuar se aksionet protestuese nuk do të ndalen deri në përmbushjen e plotë të kërkesave të tyre. “Do t’i mbushim rrugët dhe sheshet e do t’i bllokojmë institucionet deri kur çdo kërkesë e jona të plotësohet. Zëri ynë do të dëgjohet. Shteti do të japë llogari”, thuhet prerazi në njoftimin e Kolektivit. Sa i përket itinerarit të lëvizjes, protestuesit do të grumbullohen fillimisht në sheshin “Zahir Pajaziti”. Nga kjo pikënisje, marshi do të vijojë drejt ndërtesës së Qeverisë së Kosovës dhe Këshillit Prokurorial të Kosovës, për të shprehur revoltën ndaj institucioneve të drejtësisë dhe sigurisë. Organizatorët ftojnë edhe një herë të gjithë qytetarët që t'i bashkohen këtij marshi masiv për të ngritur zërin kundër dhunës dhe për të kërkuar llogaridhënie nga shteti.