Nga skema e re mujore për fëmijët te kufizimi i rrjeteve sociale: Rama zbulon paketën e masave

Kryeministri i Shqipërisë, Edi Rama, ka bërë të ditur se ekzekutivi ka përgatitur një paketë të re masash për të mbështetur shtresat në nevojë dhe studentët, ndërkohë që ka paralajmëruar nisjen e një diskutimi mbarëkombëtar lidhur me vendosjen e kufizimeve për përdorimin e rrjeteve sociale nga ana e të miturve. Gjatë fjalës së tij, kreu i qeverisë theksoi se në buxhetin e ardhshëm është parashikuar që i njohur si bonusi i bebes të kthehet në një ndihmë financiare të rregullt mujore për fëmijët, me qëllim lehtësimin e buxhetit familjar. Një tjetër pikë kyçe e trajtuar nga Rama ishte ndikimi shqetësues i platformave digjitale tek brezi i ri, ku sipas tij, izolimi dhe vetmia që ato krijojnë përbëjnë një kërcënim real për demokracinë dhe komunikimin e mirëfilltë mes njerëzve. Në këtë kontekst, kryeministri sugjeroi hapjen e një tryeze diskutimi mbi mundësinë e ndalimit të aksesit në rrjetet sociale për fëmijët dhe adoleshentët, duke marrë në shqyrtim kufijtë e moshës 16 ose 18 vjeç. Sipas tij, qeveria do të angazhohet në një proces konsultimi me trupën pedagogjike, prindërit dhe institucionet arsimore, duke ndjekur modelin e mëparshëm të përdorur për kufizimin e platformës TikTok. “Ne sot kemi një subvencionim të sigurimeve shoqërore dhe shëndetësore për të gjitha nënat e papuna që rrisin fëmijë të mitur dhe që janë kryefamiljare, por nuk mjafton. Në buxhetin e ri kemi vendosur që bonusin e bebes ta transformojmë në një skemë mbështetjeje të rregullt për fëmijët çdo muaj, që të ndikojmë në të ardhurat e familjeve që kanë një fëmijë më shumë. Kemi vendosur të rrisim më shumë se dyfish mbështetjen financiare për studentët që vijnë nga familjet në nevojë, e cila do të shkojë në nivelin e gjysmës së pagës minimale. Mbi të gjitha, unë besoj shumë fort që kjo situatë e re, e gatuar me vite në Europë dhe në Shqipëri, si rezultat i arsyeve që janë sa të ngjashme, aq edhe të ndryshme, kërkon një qasje të re ndaj gjithçkaje që ndihmon socializimin fizik të njerëzve. Rrjetet sociale kanë stimuluar një vetmi të një natyre shumë të rrezikshme për bashkëjetesën demokratike në një hapësirë sociale të përbashkët. Duhet hapur debati se si dhe kur duhet të kufizojmë aksesin në rrjetet sociale të të miturve, deri në çfarë kufiri moshe, 16 apo 18 vjeç, që të mos kenë më asnjë mundësi që të kenë rrjetet e tyre sociale individuale. Ne do të fillojmë një konsultim, siç bëmë në rastin kur na u desh të kufizonim TikTok-un. Do të fillojmë një diskutim me mësuesit, prindërit dhe shkollat për kufizimin e rrjeteve sociale për të miturit,” – u shpreh kryeministri i Shqipërisë, teksa ishte prezent në tryezën e Këshillit Kombëtar për të Drejtat dhe Mbrojtjen e Fëmijëve. Ndër të tjera, kreu i qeverisë bëri me dije se duke filluar nga viti i ardhshëm, sistemi arsimor do të sjellë një risi, ku fëmijët do të qëndrojnë në mjediset shkollore deri në orën 17:00. “Puna që duhet bërë bashkërisht mes nesh e shoqërisë civile të interesuar për këtë pjesë, për të rritur gamën e aktiviteteve sociale të fëmijëve nga sporti te kultura dhe në mes të cilave janë të gjitha pjesët që kanë të bëjnë me skenën, pikturën, zejet, me artin, filmin dhe fotografinë e me radhë. Zgjatja e qëndrimit të fëmijëve në shkollë është diçka që do të fillojë menjëherë vitin e ardhshëm. Kemi vendosur një buxhet të posaçëm në mënyrë që prindërit të punojnë dhe fëmijët të jenë në mjediset e shkollës deri në 17:00 pasdite”, tha Rama.