Lamtumira e fundit për akademik Luan Omarin, personalitetet e shkencës dhe arsimit nderojnë veprën e tij

Akademia e Shkencave të Shqipërisë organizoi sot një ceremoni solemne për t'i dhënë lamtumirën e fundit akademik Luan Omarit, i cili u nda nga jeta një ditë më parë në moshën 101-vjeçare. Në këtë tubim përkujtimor morën pjesë krerët dhe anëtarët e Kryesisë së këtij institucioni, ku spikatën prania e kryetarit Skënder Gjinushi, zëvendëskryetarit Vasil Tole dhe sekretares shkencore Anila Hoda, krahas familjarëve, miqve, kolegëve dhe bashkëpunëtorëve të afërt të të ndjerit. Fjalën hapëse të ngjarjes e mbajti sekretarja shkencore Anila Hoda, e cila ftoi fillimisht të pranishmit të mbanin një minutë heshtje për të nderuar kujtimin e figurës së shquar të shkencës shqiptare. Gjatë fjalës së saj, Hoda e cilësoi akademik Luan Omarin si një ndër themeluesit e Akademisë së Shkencave që daton në vitin 1972, duke e vlerësuar atë si një shtyllë të mendimit juridik dhe një profesor që ia fali gjithë jetën ngritjes së institucioneve, arsimit dhe kërkimit shkencor në vend. Ajo vuri në dukje se humbja e tij shënon edhe shkëputjen e lidhjes së fundit të drejtpërdrejtë me themeluesit e vitit 1972, ndërsa kujtoi angazhimin e tij ndër vite si sekretar shkencor dhe zëvendëskryetar, duke përmendur autoritetin, urtësinë dhe qytetarinë e rrallë që e dallonin. Sipas saj, trashëgimia e lënë pas nga Omari shtrihet përtej veprave shkencore dhe fushës juridike, duke vazhduar të jetojë te brezat e studentëve dhe studiuesve që ai udhëzoi dhe frymëzoi përgjatë karrierës së tij të gjatë. Në emër të institucionit, ajo u shprehu ngushëllimet më të sinqerta familjarëve, duke theksuar se kontributi dhe vepra e tij do të mbeten të paharrueshme në analet e historisë shkencore dhe të drejtës në Shqipëri. Ceremonia vijoi me fjalën e rektorit të Universitetit të Tiranës, prof. dr. Artan Hoxha, i cili solli në vëmendje kontributin e jashtëzakonshëm të akademik Omarit në arsimin e lartë dhe zhvillimin e shkollës shqiptare të së drejtës. Rektori Hoxha e quajti atë një ndër figurat kyçe të konstitucionalizmit në vend, i cili udhëhoqi me vizion dhe përkushtim Fakultetin e Shkencave Politiko-Juridike për afro tri dekada, duke lënë gjurmë të pashlyeshme te brezat e juristëve që u diplomuan nën kujdesin e tij. Në përmbyllje të fjalës së tij, ai i përcjellë ngushëllimet familjes, duke pohuar se trashëgimia e lënë nga profesori do të vijojë të ndriçojë përmes institucioneve që ai ndërtoi dhe vlerave njerëzore që përçoi. Ndërkohë, kryetarja e Komisionit të Përhershëm të Shkencave Sociale dhe Juridike pranë ASHSH-së, Aurela Anastasi, ndau kujtime nga koha kur ai ishte profesori i saj, duke e vlerësuar për korrektësinë, përpikërinë dhe aftësinë e veçantë për të zbërthyer me objektivitet çështjet komplekse juridike.