Largimi i Gazmend Hoxhës, reagon me emocione zëdhënësi i Policisë: Mirënjohje për guximin dhe burrërinë e tij

Zëdhënësi i Policisë së Kosovës, Daut Hoxha, me origjinë nga Drenasi, ka bërë një reagim publik pas dorëheqjes së Drejtorit të Përgjithshëm të këtij institucioni, Gazmend Hoxha, i cili gjithashtu vjen nga i njëjti rajon. Përmes një mesazhi të shpërndarë në rrjetet sociale, Daut Hoxha ka përcjellë falënderime dhe konsideratë të lartë për ish-drejtorin, duke vënë në pah angazhimin, parimet morale dhe qëndrueshmërinë e treguar përgjatë mandatit të tij në krye të Policisë së Kosovës. “Disa njerëz nuk vlerësohen vetëm për pozitën që mbajnë, por për gjurmët që lënë me punën, karakterin, integritetin dhe guximin e tyre!”, ka shkruar ai në postimin e tij. Hoxha ka vënë në dukje se nën udhëheqjen e Gazmend Hoxhës, struktura policore është përballur me sfida komplekse, por krahas kësaj ka arritur suksese të dukshme dhe progres në realizimin e detyrave të saj ligjore. “Kam pasur nderin të bashkëpunoj nga afër me të dhe të dëshmoj jo vetëm përkushtimin e tij në punë, por edhe burrërinë, vendosmërinë, guximin dhe integritetin njerëzor. Ai është nga ata njerëz që nuk i shmangen përgjegjësisë, që qëndrojnë përballë sfidave dhe që e kuptojnë se shërbimi ndaj vendit është mbi çdo interes personal”, u shpreh zëdhënësi. Ai gjithashtu ka vlerësuar se përmbyllja e një detyre zyrtare nuk e zbeh në asnjë mënyrë vlerën e punës dhe respektin e fituar ndër vite. “I nderuar Drejtor, pozita mund të përfundojë, por kontributi, dinjiteti dhe respekti i fituar nuk përfundojnë me të”, ka shtuar ai. Në mbyllje të reagimit të tij, Daut Hoxha ka falënderuar ish-drejtorin për bashkëpunimin e deritanishëm dhe mbështetjen e dhënë, duke i uruar fat në sfidat e ardhshme. “Respekt për njeriun trim, për profesionistin dhe për burrin e fjalës. Suksese në çdo moment të ardhshëm!”, përfundon shkrimi i tij. Kujtojmë se Gazmend Hoxha dha dorëheqjen nga posti i numrit një të Policisë së Kosovës pas ngjarjes tragjike të vrasjes së Arlinda Zekajt në Vitomiricë të Pejës, një vendim ky që u mor si shenjë e qartë e përgjegjësisë morale dhe institucionale.