Forma e shkëlqyer e Edon Zhegrovës tërheq vëmendjen në Itali, mesazh i qartë për stafin e Juventusit

Paraqitjet e fundit të Edon Zhegrovës me fanellën e Kombëtares së Kosovës kanë bërë bujë në mediat sportive në Itali, ku sulmuesi shqiptar është vënë në qendër të vëmendjes për shkak të ecurisë së tij pozitive. Një nga mediumet më të njohura italiane i ka kushtuar një hapësirë të veçantë yllit kosovar, duke analizuar ndikimin e tij në fushë. Zhegrova u fut në lojë gjatë pjesës së dytë në takimin kundër Austrisë, duel të cilin Kosova e mbylli me humbje 3:1, megjithatë ishte pikërisht ai që shënoi golin e vetëm për “Dardanët”, duke u treguar i saktë nga penalltia. Pavarësisht rezultatit negativ për përfaqësuesen kosovare, shtypi italian ka vlerësuar vazhdimësinë e formës së tij, duke përmendur se sulmuesi ka regjistruar tashmë tre gola dhe një asistim në gjashtë paraqitjet e para të këtij edicioni. Në shkrimin e publikuar, thuhet se goli nga pika e bardhë konfirmon formën e lartë të Edon Zhegrovës dhe shërben si një sinjal i fuqishëm për trajnerin e Juventusit, Luciano Spalletti, i cili gjatë edicionit të kaluar nuk pati mundësi të mbështetej vazhdimisht te potenciali i plotë i lojtarit. Analiza sugjeron se anësori kosovar mund të fitojë më shumë hapësirë në skemat e skuadrës italiane dhe të bëhet pjesë kyçe e rotacionit, duke rivalizuar drejtpërdrejt me Francisco Conceicaon për një vend as ë titullar në formacionin bazë. Në skemat taktike me sistemin 4-2-3-1 që preferon trajneri Spalletti, Zhegrova shihet si një armë e fortë për krahun e djathtë të repartit ofensiv, pozicion ku aktualisht luan edhe portugezi Conceicao. Megjithatë, para se t'i kthehet angazhimeve me klubin, vëmendja e plotë e Zhegrovës mbetet te Përfaqësuesja e Kosovës. “Dardanët” do të zbresin sërish në fushë të enjten për t'u ndeshur me Izraelin në Hungari, në kuadër të ndeshjeve të Ligës së Kombeve.