Lojërat Mesdhetare 2030: Kurti konfirmon përfshirjen e Pejës, Gjakovës dhe Prizrenit

Kryeministri i vendit, Albin Kurti, ka bërë të ditur se qytetet e Pejës, Gjakovës dhe Prizrenit do të jenë pika kyçe ku do të zhvillohen garat në kuadër të Lojërave Mesdhetare “Prishtina 2030”. Në mbledhjen e fundit të Komitetit Organizativ të Lojërave Mesdhetare (KOLM) janë shqyrtuar draft-Masterplani, projektet e prioritetit të lartë dhe e ecuria e përgatitjeve për këtë ngjarje të madhe sportive. Gjatë këtij takimi, kreu i ekzekutivit theksoi se është rikonfirmuar vendosmëria për t'i mbajtur garat sipas parashikimeve të dosjes së kandidaturës, duke përfshirë edhe qendra të tjera përtej kryeqytetit. “Peja, Gjakova, Prizreni, Drenasi dhe Skenderaj, së bashku me komunat e tjera, kanë qenë pjesë e propozimit të Kosovës që nga faza e aplikimit. Pikërisht me këtë koncept Kosova e fitoi të drejtën e organizimit të Lojërave Mesdhetare Prishtina 2030”, ka deklaruar Kurti. Ai shtoi se shtrirja e aktiviteteve sportive në këto rajone dhe funksionalizimi i hapësirave ekzistuese do të integrohen në versionin përfundimtar të Masterplanit, i cili vazhdon të jetë në proces shqyrtimi. Në këtë kuadër, planet përfshijnë edhe ndërhyrjet infrastrukturore që po ndodhin në Qendrën Nacionale të Xhudos në Pejë, në palestrën “Sezai Surroi” në Prizren, si dhe në atë “Shani Nushi” në Gjakovë. “Këto investime mbështesin zhvillimin e sportit nëpër komuna dhe mbeten në shërbim të sportistëve edhe pas përfundimit të Lojërave”, u shpreh ai. Axhenda e punës u fokusua te projekte të rëndësisë jetike, duke përfshirë transformimin e Qendrës së Studentëve në Fshat të Atletëve, Pallatin e Rinisë dhe Sporteve në Prishtinë, Qendrën Akuatike dhe atë Nacionale të Tenisit. Një vëmendje e veçantë iu kushtua edhe domosdoshmërisë së ndërtimit të Stadiumit Nacional si nismë strategjike për të ardhmen e sportit në vend. Për ceremonitë e hapjes dhe mbylljes, autoritetet po shqyrtojnë mundësinë e shfrytëzimit të stadiumit “Fadil Vokrri” me kapacitete të zgjeruara, ndërsa po vlerësohen me kujdes parametrat organizativë dhe afatet kohore. Në përmbyllje të takimit, palët u dakorduan që KOLM të dalë me një qëndrim unik në mbledhjen e ardhshme me Komitetin Ndërkombëtar të Lojërave Mesdhetare, ku do të bëhet edhe prezantimi i hapave vijues. “Anëtarët shprehën njëzëri përkushtimin për organizimin e suksesshëm të Lojërave, duke theksuar rëndësinë e këtij projekti për zhvillimin e sportit, përmirësimin e infrastrukturës dhe promovimin ndërkombëtar të Kosovës”, përfundoi Kurti.