Sydney Sweeney dhe Scooter Braun shfaqen krah për krah në rrugët e New Yorkut

Aktorja e njohur Sydney Sweeney dhe producenti i njohur Scooter Braun janë kapur nga aparatet e fotografëve gjatë një daljeje publike në New York, ku duket se kanë kaluar një mbrëmje relaksuese në zonën e Upper West Side. 29-vjeçarja ka tërhequr vëmendjen e kalimtarëve e veshur me një kostum të bardhë tejet elegant, ndërkohë që dyshja është parë duke ecur dorë për dore përgjatë shëtitjes së tyre. Për këtë mbrëmje, Sydney kishte përzgjedhur një xhaketë të ngushtë me nuanca bezhë, të cilën e kishte kombinuar me pantallona të prera drejt, taka në të njëjtën ngjyrë dhe një çantë dore prej lëkure. Stili i saj u kurua deri në detajin e fundit me flokë biondë të stiluar në kaçurrela voluminoze, syze dielli dhe vathë që binin në sy. Nga ana e tij, Scooter Braun u shfaq i veshur me pantallona të bardha, një këmishë në ngjyrë blu të errët dhe një xhaketë kafe, ndërsa afërsia mes tyre gjatë gjithë ecjes ka konfirmuar kiminë e çiftit, lidhja e të cilëve thuhet se ka nisur para më shumë se një viti. Kjo shëtitje romantike vjen në një kohë kur aktorja është mjaft e angazhuar në sheshxhirimet e vazhdimit të filmit The Housemaid, proces ky që po zhvillohet pikërisht në metropolin amerikan. Gjatë punës për këtë projekt kinematografik, ajo është parë në Park Avenue duke rikthyer në jetë rolin e saj si Millie Calloway, teksa nuk kanë munguar as çastet e hareshme me bashkëpunëtorët e filmit. Historia e dashurisë mes Sydney dhe Scooter ka nisur verën e kaluar, gjatë kremtimeve martesore të Jeff Bezos dhe Lauren Sanchez. Nisja e kësaj romance erdhi pak muaj pasi aktorja i dha fund zyrtarisht fejesës së saj me biznesmenin Jonathan Davino.