Bashkëpunimi ushtarak në fokus: Maqedonci takon zyrtaren e lartë të USEUCOM-it

Ministri i Mbrojtjes i Kosovës, Ejup Maqedonci, ka zhvilluar një takim zyrtar me Sandra Oudkirk, e cila mban pozitën e zëvendëses civile të Komandantit dhe këshilltares për Politikë të Jashtme në Komandën Evropiane të Shteteve të Bashkuara (USEUCOM). Përmes një publikimi në rrjetet sociale, ministri Maqedonci bëri të ditur se nën qendër të vëmendjes së këtij takimi ishte partneriteti dypalësh dhe mundësitë konkrete për zgjerimin e bashkëpunimit në sektorin e mbrojtjes ndërmjet Kosovës dhe USEUCOM-it. Gjatë bisedës u trajtuan gjithashtu planet për zhvillimin e mëtutjeshëm të Forcës së Sigurisë së Kosovës (FSK), si dhe u shqyrtuan hapësirat e mundshme për bashkëpunim në kuadër të industrisë së mbrojtjes. "Sot pata kënaqësinë të takoj znj. Sandra Oudkirk, Zëvendësen civile të Komandantit dhe Këshilltaren për Politikë të Jashtme të Komandës Evropiane të Shteteve të Bashkuara (USEUCOM)," u shpreh Maqedonci. Ai shtoi se gjatë takimit u diskutua për ecurinë e bashkëpunimit dhe perspektivat e forcimit të partneritetit mbrojtës mes dy vendeve, si dhe u shkëmbyen mendime për zhvillimin e ardhshëm të FSK-së dhe mundësitë e ndërveprimit në industrinë e mbrojtjes. Në fund të takimit, ministri shprehu mirënjohjen e tij për znj. Oudkirk, duke e falënderuar për mbështetjen e palëkundur dhe kontributin afatgjatë që Shtetet e Bashkuara të Amerikës i kanë dhënë Republikës së Kosovës, ndërsa theksoi se ky partneritet mbetet shtyllë kryesore për ngritjen e kapaciteteve mbrojtëse dhe garantimin e një të ardhmeje të sigurt.