Reagimi prekës i këngëtares Antigona Bajrami: Arlinda Zekaj nuk ishte thjesht një emër

E njohur jo vetëm për kontributin e saj në skenën muzikore shqiptare, por edhe për angazhimin e saj të vazhdueshëm humanitar pranë shtresave në nevojë, këngëtarja Antigona Bajrami ka përcjellë një mesazh mjaft emocional. Duke qenë se jeton larg vendlindjes dhe nuk ka mundur të marrë pjesë fizikisht në protestat e organizuara nën thirrjen “Edhe sa Arlinda”, ajo ka zgjedhur një formë unike sensibilizimi, duke publikuar fotografi bardhezi ku shfaqet e veshur me të zeza. Artistja ka tronditur opinionin publik me vargjet e kushtuara tragjedisë së ndodhur dhe jetës së prerë në mes të Arlinda Zekajt. Përmes një postimi në rrjetet sociale, mbi imazhin e shpërndarë, ajo ka shkruar me dhimbje: “Ajo ishte një grua me ëndrra, forcë dhe një zemër plot jetë... Arlinda Zekaj nuk ishte vetëm një emër, ajo ishte një jetë, një dritë....”. Përtej artit dhe muzikës, Bajrami ka dëshmuar edhe një herë se ndjeshmëria ndaj ngjarjeve të rënda që godasin shoqërinë tonë mbetet prioritet. Si grua dhe si qytetare, ajo është solidarizuar thellësisht me dhimbjen e kësaj ngjarjeje makabre, duke bërë thirrje për reflektim përmes pamjeve simbolike me veshje zie që ka ndarë me ndjekësit e saj.