Aksident apo sulm i qëllishëm në Torino? Babai akuzon ish-partneren për përplasjen e djalit 5-vjeçar

Një ngjarje e rëndë e ndodhur mbrëmjen e djeshme rreth orës 22:30 dyshohet të fshehë pas një histori konfliktesh dhe xhelozie, ku i mituri 5-vjeçar mbeti i plagosur pasi u godit nga një automjet. Incidenti u regjistrua në kryqëzimin e rrugëve Pinelli dhe Industria, në lagjen San Donato, ndërsa fëmija u dërgua në gjendje të rëndë shëndetësore drejt spitalit Regina Margherita. Gjatë momentit të ngjarjes, vogëlushi po ecte së bashku me babain, nënën dhe motrën e tij, kur një automjet tip “Fiat Panda” ngjyrë e verdhë ka dalë nga kontrolli duke i përplasur. Si pasojë e goditjes, fëmija përfundoi në asfalt, ndërsa makina vijoi lëvizjen derisa përplasi një automjet tjetër të parkuar në zonë. Drejtuesja e mjetit u largua menjëherë nga vendi i ngjarjes pa dhënë ndihmë. Megjithatë, ajo që fillimisht u raportua si një aksident i zakonshëm trafiku, mori menjëherë një kthesë dramatike. Ishte pikërisht babai i fëmijës ai që identifikoi personin në timon, duke deklaruar me dëshpërim se bëhej fjalë për ish-partneren e tij dhe se sulmi ishte bërë me dashje, duke ngritur dyshimet se shënjestër e vërtetë mund të ketë qenë ai vetë. Autoritetet policore, konkretisht karabinierët e njësisë së ndërhyrjes së shpejtë në Torino, arritën të lokalizojnë dhe të vënë në pranga 24-vjeçaren Camilla D’Alessandra, banuese në Torino. Ndaj saj rëndojnë zyrtarisht akuzat e rënda për tentativë vrasjeje dhe plagosje të rëndë. Pavarësisht traumave në kraharor dhe në abdomen të pësuara nga goditja, fëmija ka qenë i vetëdijshëm gjatë gjithë kohës. Ai mori ndihmën e parë mjekësore nga ekipet e urgjencës 118 dhe u transportua me kod të kuq në spitalin pediatrik, ku mjekët kanë përcaktuar se periudha e shërimit të dëmtimeve do të kërkojë rreth 40 ditë. Pas ngjarjes, pjesëtarë të komunitetit maroken, ku bën pjesë familja e fëmijës, u mblodhën në vendin e aksidentit duke u angazhuar në kërkimin e drejtueses. Në vendngjarje ndërhynë menjëherë forcat e rendit dhe policia bashkiake për të qetësuar situatën dhe për të nisur hetimet paraprake. Ndërkohë që grupi hetimor po punon intensivisht për zbardhjen e plotë të dinamikës, avokati mbrojtës i të resë së ndaluar, Cristian Scaramozzino, ka kërkuar maturi në konkluzione. Ai u shpreh se fakti që autorja dhe babai i fëmijës njiheshin më parë nuk e përjashton plotësisht mundësinë e një aksidenti fortuit, duke kërkuar që kjo hipotezë të merret ende në konsideratë.