Tragjedi në autostradë: 56-vjeçarja nga Shkupi shuhet brenda automjetit të saj

Një ngjarje e rëndë ka tronditur opinionin publik, pasi një grua 56-vjeçare nga Shkupi është gjetur pa shenja jete brenda një veture në autostradën Gjevgjeli-Veles. Lajmi është bërë i ditur zyrtarisht nga Sektori i Punëve të Brendshme të Velesit. Sipas autoriteteve policore, rasti është denoncuar në orën 19:40, ku është raportuar se në aksin rrugor Gjevgjeli-Veles, brenda një automjeti të tipit "Volkswagen Passat" me targa të kryeqytetit, është gjetur e pajetë shtetasja M.D., e moshës 56 vjeçe. Ekipi i Mjekësisë Urgjentë që ka dalë në vendin e ngjarjes ka konstatuar vdekjen, ndërsa nga kontrolli paraprak nuk janë vërejtur shenja dhune në trupin e viktimës. Megjithatë, një grup ekspertësh nga SPB Veles ka kryer hetimet e duhura në vendngjarje për të zbardhur rrethanat. Në lidhje me këtë rast tragjik, prokurori publik ka lëshuar urdhër të prerë, sipas të cilit trupi i pajetë i viktimës është dërguar për obduksion mjeko-ligjor për të përcaktuar shkakun e saktë të vdekjes.