Përplasje mes Real Madridit dhe Zinedine Zidanes për shkak të dëmtimit të Kylian Mbappes

Kylian Mbappe është kthyer në mollë sherri mes klubit të Real Madridit dhe Përfaqësueses së Francës, pasi sulmuesi pësoi një lëndim gjatë sfidës kundër Turqisë. Sulmuesi kryesor ishte ftuar nga kombëtarja për sfidat e vlefshme për Ligën e Kombeve, por u detyrua të lërë fushën e gjelbër pa u mbushur një orë lojë, vetëm pesë minuta pasi kishte realizuar golin e avantazhit dhe të fitores në qytetin e Izmit. Sipas mediave ndërkombëtare, drejtuesit e Real Madridit kishin kërkuar që lojtari të kursehej për shkak të disa shqetësimeve të mëparshme në gju. Megjithatë, trajneri i francezëve, Zinedine Zidane, vendosi ta hidhte kapitenin e tij në fushë nga minuta e parë. Testet e para mjekësore të kryera pas përfundimit të takimit qetësuan disi kampin madrilen, duke përjashtuar dëmtimin e rëndë të këputjes së ligamentit të kryqëzuar anterior, megjithatë lojtari u la i lirë të largohej nga grumbullimi. Më vonë, klubi spanjoll dolën me një komunikatë zyrtare ku konfirmuan se 27-vjeçari ka pësuar një dëmtim në zonën e kapsulës së pasme të gjurit të majtë. Për të qetësuar situatën e tensionuar dhe pakënaqësinë e spanjollëve, trajneri Zidane thuhet se ka vendosur menjëherë yllin francez nën kujdesin e specializuar të stafit mjekësor të Real Madridit. Tani, në kryeqytetin spanjoll mbeten me shpresë për një rikuperim sa më të shpejtë të sulmuesit, duke marrë parasysh kalendarin e ngjeshur të ndeshjeve që e presin skuadrën sapo të përfundojë periudha e ndeshjeve kombëtare.