Hamza zbardh detajet e takimit me Kurtin: Kjo është çështja parësore për PDK-në

Kryetari i Partisë Demokratike të Kosovës, Bedri Hamza, ka folur publikisht rreth takimit të zhvilluar të dielën me kryeministrin në detyrë, Albin Kurti. I pranishëm para nisjes së seancës plenare, lideri i opozitës bëri të ditur se në fokus të bisedës kanë qenë aktualiteti politik në vend, projektligji që lidhet me Dhomat e Specializuara, si dhe procesi i zgjedhjes së presidentit të ardhshëm. Megjithatë, ai sqaroi se gjatë këtij bashkëbisedimi nuk është folur për ndonjë emër të përveçëm lidhur me postin e kreut të shtetit. Duke u ndalur te projektligji për Dhomat e Specializuara, Hamza e cilësoi miratimin e tij si domosdoshmëri dhe prioritet absolut për subjektin që ai drejton. Ai theksoi se vetëm pasi të mbyllet ky kapitull, PDK-ja do të jetë e gatshme t'i hapë rrugë diskutimeve për çështje të tjera, përfshirë edhe zgjedhjen e presidentit. Krejt në fund, kreu i PDK-së u kujdes të sqarojë se qasja e partisë së tij nuk duhet të interpretohet si një kushtëzim politik, por si një nevojë emergjente në rrethanat aktuale në të cilat ndodhet vendi. “Prioritet projektligji për Dhomat e Specializuara. Nëse kalohet ligji, këtë nuk po e them si detyrim, po e them si nevojë. Nëse kalohet, jemi të hapur me diskutu temat tjera. Nëse nuk kalohet, nuk kemi temë më të rëndësishme se kjo”, u shpreh Hamza.