Inspektimi rutinë në veri shtrembërohet në propagandë: Si e kthejnë mediat në Beograd aksionin e tregut në “sulm”

Një aksion i rregullt kontrolli nga inspektoratet kompetente në Mitrovicë të Veriut dhe Zveçan është manipuluar nga disa medie në Beograd, të cilat e kanë paraqitur atë si një “sulm” të kryeministrit Albin Kurti ndaj komunitetit serb. E përditshmja serbe “Novosti” e ka publikuar lajmin me një titull sensacional e dramatik në mëngjesin e së premtes, duke pretenduar se kreu i ekzekutivit kosovar ka ndërmarrë veprime gjatë natës kundër qytetarëve. Megjithatë, ironikisht, emri i Kurtit nuk përmendet askund në trupin e artikullit, e aq më pak ndonjë vendim apo deklaratë zyrtare e tij. Sipas Policisë së Kosovës, gjatë operacionit të ndërmarrë gjatë natës janë mbyllur gjithsej shtatë subjekte afariste, prej të cilave pesë në Mitrovicën e Veriut dhe dy në Zveçan. Zëvendëskomandanti i Policisë për rajonin e Veriut, Erduan Baliqi, ka konfirmuar se mbyllja e lokaleve është kryer ekskluzivisht nga inspektorët e tregut, ndërsa ka bërë të ditur se nuk ka pasur asnjë person të ndaluar gjatë këtij aksioni. Në këtë operacion të përbashkët kanë marrë pjesë Inspektorati Qendror i Mbikëqyrjes së Tregut, ai sanitar, si dhe Administrata Tatimore e Kosovës, ndërsa strukturat policore janë angazhuar vetëm në rolin e asistencës për të garantuar rendin dhe sigurinë e inspektorëve. Pjesa e artikullit që flet për “njerëz të nxjerrë jashtë” mbështetet, sipas vetë gazetës serbe, vetëm në thashetheme dhe informacione joformale të dëshmitarëve për një lokal të vetëm, konkretisht kafenenë “Knez”, e cila ndodhet në shëtitoren kryesore të Mitrovicës së Veriut. Ndërkohë, një portal tjetër vendor në raportimet e tij i është referuar vazhdimisht policisë me termin e anshëm “e ashtuquajtura polici e Kosovës”. Ndryshe nga qasja e “Novosti”-t, media të tjera në serbisht si “Danas”, “N1” dhe “Nova.rs” ngjarjen e kanë trajtuar në mënyrë profesionale si një aksion zyrtar inspektimi, duke pasqyruar listën e lokaleve të mbyllura dhe deklaratat zyrtare të policisë pa përfshirë spekulime politike. Sipas portalit “Nova.rs”, në mesin e bizneseve që kanë vënë kyçet janë restoranti “Queen”, kafeneja “Princip”, lokali “Galerija”, shisha bari “Parlament” dhe restoranti “Mreža”. Përfaqësuesit e kafenesë “Princip” kanë reaguar përmes rrjeteve sociale duke pohuar se kjo është hera e dytë brenda një viti që përballen me mbyllje nga inspektoratet. Ky nuk përbën një rast të izoluar të narrativës mediatike nga Beogradi. Vetëm gjatë kësaj jave, e njëjta gazetë ka etiketuar si “terror” vendimin e një gjykate në Prishtinë për vazhdimin e masës së paraburgimit ndaj nëntë serbëve nga Zubin Potoku, kurse një operacion policor në disa fshatra e ka përshkruar me terma luftarakë. Në të dyja rastet, vendimet institucionale të drejtësisë dhe zbatimi i ligjit janë personalizuar qëllimisht. Kontrolle të ngjashme të subjekteve afariste zhvillohen rregullisht edhe në komunat e tjera të vendit. Për ilustrim, në muajin maj të vitit 2025, autoritetet policore dhe inspektorati komunal kontrolluan katër lokale nate në jug të Mitrovicës, ku pati gjobitje dhe mbyllje të përkohshme për shkelje të rregullave. Deri në momentin e publikimit të këtij artikulli, institucionet e inspektoratit nuk kishin dalë ende me një njoftim zyrtar për arsyet e sakta ligjore që çuan në mbylljen e këtyre lokaleve në veri, apo për afatin kohor se sa do të zgjasin këto masa.