Dua Lipa mahnit me fustan smeraldi në New York dhe korr fitore të rëndësishme ligjore

Ylli i njohur i muzikës, Dua Lipa, ka rrëmbyer sërish vëmendjen e publikut me pamjen e saj elegante, teksa është shfaqur e veshur me një fustan përrallor ngjyrë smeraldi në fotografitë e publikuara së fundmi në profilin e saj në Instagram. Artistja me famë botërore, e cila i ndan angazhimet e saj mes New York-ut dhe Britanisë së Madhe, ka ndarë me ndjekësit disa momente nga rutina e saj e ngarkuar, duke shoqëruar imazhet edhe me një shënim humoristik. Duke iu referuar udhëtimeve të shpeshta dhe ritmit frenetik të jetës, ajo ka shkruar: “Unë nuk e di më në cilën zonë kohore jam”. Pavarësisht axhendës së ngjeshur profesionale dhe kohës që ia dedikon familjes, këngëtarja ka gjetur hapësirën e duhur për të kaluar një mbrëmje romantike në krah të bashkëshortit të saj, Callum Turner. Çifti ka zgjedhur një restorant luksoz për të darkuar në New York, përpara se të ndërmerrte një shëtitje për të shijuar pamjen e perëndimit të diellit. Kjo paraqitje vjen në një periudhë suksesesh për Dua Lipën, e cila pak kohë më parë ka shënuar një fitore të rëndësishme ligjore kundër një individi nga Hong Kongu. Ky i fundit kishte nxjerrë në shitje në internet produkte të paautorizuara që mbanin emrin e saj, duke përfshirë veshje, çanta pëlhure dhe aksesorë të ndryshëm për kokën. Organizata Botërore e Pronësisë Intelektuale (WIPO), pjesë e Kombeve të Bashkuara, ka marrë vendim në favor të këngëtares, duke vlerësuar se domeni “dualipa-asiastore.com” ishte regjistruar dhe përdorur në keqbesim. Si pasojë e këtij vendimi, është urdhëruar transferimi i menjëhershëm i domenit në pronësi të kompanisë së artistes. Në aspektin financiar, sukseset e saj konfirmohen edhe nga të dhënat e fundit të kompanisë së saj, sipas të cilave Dua Lipa ka arkëtuar mesatarisht rreth 64 mijë funte në ditë gjatë vitit të kaluar, shifër kjo që dëshmon fuqinë dhe ndikimin e jashtëzakonshëm të saj në tregun global të muzikës.