Elijona “shënjestron” ish-banorët: Disa nuk luajnë brenda, por nxisin drama sapo dalin nga shtëpia

Finalistja e edicionit të katërt të Big Brother VIP Kosova, Elijona, ka hedhur kritika të forta ndaj sjelljes së disa banorëve, duke pretenduar se ata shmangin përballjet e vërteta gjatë qëndrimit në shtëpi, për t’i zhvendosur ato në ambientin e jashtëm. Këto komente ajo i ndau gjatë një bashkëbisedimi me dy banoret që janë bërë pjesë e edicionit më të ri të këtij formati televiziv. Sipas Elijonës, strategjia e disa konkurrentëve është mjaft e qartë dhe aspak autentike. “Ka banorë që hyjnë në shtëpi dhe nuk ofrojnë asgjë, qëndrojnë pasivë. Por, sapo dalin jashtë, ata fillojnë të bëjnë ‘Big Brother’ me drama të ndryshme. Janë njerëz që presin momentin e duhur për të shpërthyer, pasi kanë lënë çështje të hapura dhe mezi presin t'i aktualizojnë ato”, u shpreh ajo. Kjo deklaratë ka nxitur spekulime të shumta në rrjet, ku shumë ndjekës po pyesin nëse këto fjalë ishin një mesazh i koduar drejtuar Benitës, me të cilën Elijona ka pasur përplasje të shpeshta gjatë rrugëtimit të tyre në spektakël.