Votimi i Deklaratës për çlirimtarët, çfarë paralajmëron deputeti Ukë Rugova?

Deputeti i Lidhjes Demokratike të Kosovës, Ukë Rugova, është shfaqur në ambientet e Kuvendit të Kosovës pak çaste përpara fillimit të seancës plenare, në të cilën është parashikuar të votohet Deklarata e Përbashkët lidhur me aktgjykimin e Dhomave të Specializuara në Hagë. I ndalur nga përfaqësuesit e mediave për të marrë një qëndrim rreth kësaj nisme dhe mundësisë së votimit të saj, ligjvënësi Rugova ka dhënë një deklaratë të përmbledhur. “Të shohim, me Grupin Parlamentar jemi duke shkuar në mbledhje, por patjetër që duhet me e votu, mirëpo ta shohim se si po koordinohet teksti njëherë”, u është drejtuar ai gazetarëve. Ndër të tjera, gjatë bisedës me gazetarët, ai ka prekur edhe temën e zgjedhjes së presidentit të vendit, duke theksuar se është e rëndësishme që kreu i shtetit të emërohet sa më parë. Sipas tij, një veprim i tillë është i domosdoshëm “që të shmangen zgjedhjet për hir të popullit dhe për hir të miqve tanë ndërkombëtarë”.