Kërkoi mbrojtje nga bandat, por “Skifteri” shqiptar tradhtohet nga videot që publikon vetë në rrjetet sociale nga gjykata

Një shtetas shqiptar, i njohur si hajdut serial dhe që po përballet me dëbimin e tij të pestë nga Mbretëria e Bashkuar, ka siguruar të drejtën e anonimitetit nga një gjykatës britanik, pasi pretendohet se jeta e tij rrezikohet nga një bandë kriminale. Megjithatë, ironikisht, vetë i dënuari ka publikuar në rrjetet sociale pamje filmike nga brenda sallës së gjyqit. Personi në fjalë është dënuar për disa vepra penale në tokën britanike dhe është dëbuar vazhdimisht nga autoritetet e emigracionit (Home Office), por ka arritur të rikthehet në mënyrë të fshehtë çdo herë. Aktualisht, ai ka bërë ankesë kundër urdhrit më të fundit të dëbimit dhe ka kërkuar azil, me pretendimin se kthimi në Shqipëri do t'i rrezikonte jetën. Gjatë seancës gjyqësore të zhvilluar javën e kaluar në Gjykatën e Emigracionit ‘Taylor House’ në qendër të Londrës, shqiptari deklaroi se ishte detyruar të largohej drejt Britanisë së Madhe, pasi sipas tij ishte “shumë e lehtë” që armiqtë ta gjurmonin në shtete të tjera evropiane. 30-vjeçari, i cili ka një fëmijë në Britani me ish-partneren e tij, shtoi se shëndeti mendor i është përkeqësuar si pasojë e interesimit mediatik për çështjen e tij. Edhe pse përfitoi anonimitetin, në ditën e seancës ai shpërndau në internet një video ku shfaqej i ulur në ambientet e pritjes së gjykatës, duke zbuluar hapur vendndodhjen e tij. Përveç kësaj, ky veprim përbën një shkelje të hapur të ndalimit të fotografimit dhe filmimit brenda institucioneve të drejtësisë, një shkelje kjo që dënohet deri në dy vjet burg për shpërfillje të gjykatës. Përfaqësuesi ligjor i tij, Eric Fripp, i kujtoi trupit gjykues se klienti kishte të drejtë për mbrojtjen e identitetit gjatë kërkesës për azil. Kjo kërkesë u miratua nga gjyqtari Ravinder Bagral. Ndonëse media nuk pati mundësi ta kundërshtonte këtë vendim në sallë, më vonë u ndërmorën hapa për shfuqizimin e tij, ndërsa një përfaqësues i gjykatës konfirmoi se kërkesa ishte në shqyrtim pas datës 15 shtator. Vendimi për t'i fshehur identitetin këtij personi ka ngjallur reagime të ashpra. Alan Mendoza, Drejtor Ekzekutiv i institucionit ‘Henry Jackson Society’, e ka kritikuar ashpër këtë masë. “Drejtësia e hapur ekziston që publiku të shohë se si merren vendimet në emër të tij. T'i japësh anonimitet një krimineli profesionist që filmon veten në gjykatë për rrjetet sociale, ndërsa përballet me dëbimin e pestë dhe përmend një kërcënim që nuk e ka denoncuar kurrë në polici, është tallje me këtë parim. Publiku meriton më shumë transparencë”, u shpreh ai. Nga ana e saj, përfaqësuesja e Home Office, Khdeeja Khan, vuri në dukje se burri ka kryer një varg vjedhjesh gjatë qëndrimit të tij në Britani, përfshirë edhe pas çdo rikthimi të paligjshëm. Gjatë seancës, ajo e pyeti drejtpërdrejt nëse i pranonte krimet e rënda dhe shkeljen e përsëritur të ligjeve kufitare britanike. I pyetur nga gjykata, shqiptari pranoi se veprat e tij penale ishin “shumë serioze”, por u mbrojt duke thënë se ishte shtyrë drejt rikthimit ilegal nga frika për jetën. Ai tregoi se kishte mbërritur në Britani në moshën 13-vjeçare, ku më pas kishte rënë pre e një bande të fuqishme që e detyronte të vidhte, ndërsa pretendimet e tij vazhdojnë se çdo herë që dëbohej në Shqipëri, përballej sërish me gjurmimin e anëtarëve të bandës.