Ish-presidenti i Interit zbulon prapaskenat: Si u tentua transferimi i Messit dhe ëndtëra e parealizuar

Në një intervistë të dhënë për të përditshmen spanjolle “AS”, ish-numri një i klubit zikaltër, Massimo Moratti, ka ndarë detaje të panjohura më parë rreth dëshirës së tij të zjarrtë për të transferuar Lionel Messin te skuadra e Interit, si dhe për një tjetër emër të madh që ka mbetur thjesht një ëndërr në sirtar. “E pashë Messin duke luajtur në një turne për grupmoshën nën 17 vjeç, në një kohë kur askush nuk fliste ende për të si për një yll të ardhshëm të futbollit botëror. E kuptova menjëherë se ai ishte një lojtar i jashtëzakonshëm, jo vetëm për shkak të cilësive të tij teknike, por sidomos për shkak të urisë dhe etjes për fitore”, u shpreh Moratti. Ish-kreu i klubit italian shtoi se që në atë periudhë ai kishte folur për argjentinasin në media të ndryshme italiane dhe se kishte ndërmarrë hapa konkretë për ta sjellë në Milano. Megjithatë, ai theksoi se çdo lëvizje ishte bërë me maturi dhe korrektësi, për të shmangur çdo keqkuptim apo situatë të pakëndshme. “E dija se Barcelona, klubi që e kishte ndihmuar të rritej dhe të zhvillohej, ishte gati t’i ofronte një kontratë, dhe unë nuk doja të ndërhyja në mënyrë të padrejtë. Pjesa tjetër tashmë është histori; katalanasit arritën t’i sigurojnë të ardhmen”, vijoi rrëfimin e tij ish-presidenti zikaltër. Gjatë bisedës, Moratti nuk la pa përmendur edhe një gjest respekti nga ana e yllit argjentinas, i cili kishte dashur ta falënderonte për interesimin e treguar ndaj tij, duke i dërguar fanellën e tij personale si një shenjë mirënjohjeje. Në fund të intervistës, kur u pyet për lojtarin që ka dëshiruar më shumë se kushdo tjetër gjatë drejtimit të Interit, Moratti përmendi një ikonë të futbollit evropian: “Lojtari më i dëshiruar? Eric Cantona. Një futbollist fantastik. Ai ishte ëndrra e vërtetë, e madhe dhe e paarritshme”.