Maqedonia e Veriut synon pagesën sipas kilometrave: Mbi 67 milionë euro të ardhura nga taksat rrugore gjatë vitit 2025

Autoritetet në Maqedoninë e Veriut po shqyrtojnë mundësinë e kalimit në një sistem të pagesës rrugore bazuar në kilometrat e përshkuar, duke lënë mënjanë për momentin idenë e zëvendësimit të pikëpagesave aktuale me vinjeta. Synimi kryesor mbetet digjitalizimi i plotë dhe krijimi i një mekanizmi që do të reflektonte drejtpërdrejt distancën e kaluar në autostradë. Ministri i Transportit, Aleksandar Nikolloski, ka sqaruar se analizat tregojnë se rreth 70 për qind e automjeteve vendase qarkullojnë kryesisht brenda komunave ku janë të regjistruara, ndërsa vetëm 30 për qind e tyre shfrytëzojnë rregullisht autostradat dhe rrugët ekspres. Sipas tij, vendosja e një vinjete të përgjithshme do të përbënte një barrë të panevojshme financiare për qytetarët që i përdorin rrallë këto akse rrugore. Një faktor tjetër kyç është trafiku transit, veçanërisht përgjatë Korridorit 10, i cili shfrytëzohet nga rreth 4,5 milionë automjete në vit. Pjesa më e madhe e të ardhurave nga taksat rrugore, të cilat për vitin 2025 arritën në shifrën prej 67,6 milionë eurosh, sigurohet pikërisht nga udhëtarët e huaj që kalojnë tranzit nëpër vend. Ndërmarrja Publike për Rrugë Shtetërore aktualisht është duke vlerësuar fizibilitetin e një sistemi të mbyllur elektronik, i cili do të tarifonte shoferët në përpjesëtim me kilometrat e përshkuar. Ky model po analizohet fillimisht për Korridorin 8, ndërkohë që paralelisht po punohet për zgjerimin e përdorimit të pajisjeve elektronike M-TAG. Nëse ky sistem gjen zbatim, ai do të mundësonte një tarifim më të drejtë: ata që përshkojnë segmente të gjata do të paguajnë më shumë, ndërsa përdoruesit e segmenteve të shkurtra do të paguajnë më pak. Megjithatë, ende mbetet e paqartë nëse do të ketë paketa abonimi apo lehtësime të tjera tarifore për qytetarët që për arsye pune udhëtojnë çdo ditë nëpër këto rrugë.