Google Chrome sjell risinë e fuqizuar nga AI që do t'ju lehtësojë lundrimin në internet

Shfletuesi i njohur i internetit, Google Chrome, po bëhet gati të implementojë një përditësim të rëndësishëm që do të transformojë plotësisht mënyrën e plotësimit të formularëve në rrjet, falë integrimit të inteligjencës artificiale (AI). Giganti i teknologjisë, Google, ka bërë të ditur se ky shfletues do të pasurohet me një variant shumë më të sofistikuar të këtij shërbimi, i cili do t’u vijë në ndihmë qytetarëve për të plotësuar fushat e ndryshme online duke shfrytëzuar të dhënat ekzistuese nga llogaritë e tyre personale në Gmail. Kjo do të thotë se softueri do të jetë në gjendje të rekomandojë të dhëna thelbësore, siç janë kodet e konfirmimit të udhëtimeve me aeroplan, numrat e anëtarësimeve, detajet e gjurmimit të pakove, numrat e porosive, vendndodhjet, kontaktet telefonike apo informacionet e kartave bankare, duke i skanuar dhe gjetur ato në mesazhet elektronike të individit. Ky funksion i ri përbën një zgjerim të aftësisë 'Personal Intelligence' të Google, e cila u jep mundësi përdoruesve që t'i lidhin aplikacionet e tyre me asistentin digjental Gemini, me qëllim gjetjen e të dhënave specifike dhe trajtimin e pyetjeve më të ndërlikuara. Megjithëse në dukje mund të duket si një ndryshim modest, ky mekanizëm premton ta bëjë eksperiencën në Chrome mjaft komode dhe funksionale. Në vend që të humbin kohë duke lëvizur nga një skedë në tjetrën për të gjetur një kod porosie apo detajet e një rezervimi, përdoruesit do t'i kenë këto të dhëna në majë të gishtave gjatë vetë procesit të plotësimit të formularëve. Forma e re e funksionimit ngjan ngushtë me një opsion të njohur nga ekosistemi i pajisjeve Apple, të cilat kapin automatikisht shifrat e verifikimit të mbërritura me anë të mesazheve telefonike dhe i bëjnë të dukshme mbi tastierë, duke lejuar futjen e tyre me vetëm një klikim. Lidhur me aspektin e sigurisë dhe privatësisë, nga Google bëjnë me dije se të dhënat me ndjeshmëri të lartë do të mbrohen përmes enkriptimit. Vetë përdoruesit do të kenë kontrollin e plotë për të vendosur në menynë e cilësimeve të Chrome nëse dëshirojnë ta vënë në punë këtë shërbim të avancuar. Procesi i shpërndarjes së këtij funksioni ka filluar tashmë në mënyrë të shkallëzuar në Shtetet e Bashkuara të Amerikës, duke përfshirë si kompjuterët ashtu edhe aparatet celulare me sisteme operative iOS dhe Android. Ai mund të përdoret aktualisht nga ata persona që përdorin Gemini në Chrome dhe që kanë të aktivizuar gjithashtu shërbimin 'Personal Intelligence'.