Mbështetje e palëkundur nga Berlini, ministri Hoxha takon zyrtarin e lartë të Bundestagut

Kryediplomati shqiptar, Ferit Hoxha, ka zhvilluar këtë të hënë një takim zyrtar në kryeqytet me kryetarin e Komisionit për Çështjet e Bashkimit Evropian në Bundestagun gjerman, Anton Hofreiter, ku është rikonfirmuar mbështetja e fuqishme e Gjermanisë për integrimin evropian të vendit. Nëpërmjet një postimi në platformën sociale X, ministri Hoxha bëri të ditur se biseda u fokusua te hapat konkretë dhe përparimin e shënuar nga Shqipëria në zbatimin e reformave thelbësore drejt anëtarësimit të plotë në BE. "Gjermania ka qenë një nga mbështetëset më të forta dhe më të qëndrueshme të Shqipërisë gjatë gjithë këtij udhëtimi. Ne e vlerësojmë shumë mbështetjen e Gjermanisë për një proces zgjerimi të bazuar në meritë dhe udhëheqjen e saj në promovimin e një perspektive të besueshme evropiane për Ballkanin Perëndimor", u shpreh ministri Hoxha në mesazhin e tij. Gjatë këtij takimi u vu theksi te partneriteti i shkëlqyer dypalësh mes Tiranës dhe Berlinit, duke vlerësuar lart domosdoshmërinë e intensifikimit të dialogut dhe bashkëpunimit ndërparlamentar ndërmjet dy shteteve. Në përfumim të bisedimeve, ministri Hoxha theksoi se vizioni dhe synimi i përbashkët mbetet ndërtimi i një Evrope më të bashkuar dhe më elastike ndaj sfidave të kohës.