Dortmundi në pritje të Karetsas: Niko Kovac zbardh planin për 'Der Klassiker' ndaj Bayernit

Trajneri i Borussia Dortmundit, Niko Kovac, ka lënë të hapur mundësinë e rikthimit të Konstantinos Karetsas në formacion për sfidën e madhe të së shtunës kundër Bayern Munichut, e cila vlen për Bundesligën gjermane. Mesfushori ofensiv nga Greqia është duke u rikuperuar nga një lëndim në kyçin e këmbës, pësuar më 17 tetor në barazimin pa gola kundër Union Berlin. Karetsas, i cili është konsideruar si një ndër blerjet kryesore të verës për Dortmundin, ka filluar tashmë t'i bashkohet pjesërisht seancave stërvitore të grupit. “Sot ai u stërvit me ekipin për herë të parë. Nëse gjithçka shkon sipas planit dhe ai stërvitet sërish të premten, atëherë do të marrim vendimin përfundimtar nëse do të jetë pjesë e udhëtimit drejt Munichut”, deklaroi Kovac në konferencën për media të mbajtur të enjten. Kujtojmë se për futbollistin grek ky ka qenë një sezon sfidues, pasi më herët, në muajin shtator, ai kishte pësuar edhe një kolaps të shkurtër si pasojë e problemeve me qarkullimin e gjakut, një episod që u konfirmua zyrtarisht nga klubi asokohe. Borussia Dortmund vjen në këtë përballje me moral të lartë, pas fitores dramatike 3:2 ndaj Werder Bremenit të martën, rezultat që i siguroi kualifikimin në rundin e tretë të Kupës së Gjermanisë. Ndeshja e së shtunës konsiderohet si një nga takimet më decizive të këtij sezoni, pasi të dyja rivalet ndodhen në krye të tabelës me nga 17 pikë, ndërsa Bayerni mban kreun falë një diference më të mirë të golave. Statistikat tregojnë një epërsi ofensive të bavarezëve, të cilët kanë tundur rrjetën 25 herë në shtatë ndeshje, përkundrejt 12 golave të shënuar nga Dortmundi. Megjithatë, trajneri Kovac shfaqet optimist, duke e vlerësuar kundërshtarin si standardin më të lartë të futbollit evropian. “Bëhet fjalë për 'Der Klassiker' dhe është kënaqësi që pas kaq shumë kohësh po përballemi me pikë të barabarta. Kjo e shton peshën e ndeshjes, por sigurisht nuk e bën më të thjeshtë. Bayerni është standardi i artë në Gjermani dhe në Evropë. Ne kemi shanset tona për të nxjerrë një rezultat pozitiv, edhe pse jemi të vetëdijshëm për vështirësitë që na presin”, përfundoi strategu i Dortmundit.