Tragjedia në Pejë: KPK merr masa drastike, suspendohet kryeprokurorja dhe prokurorja e rastit

Këshilli Prokurorial i Kosovës ka zyrtarizuar vendimin për pezullimin nga detyra të kryetares së Prokurorisë Themelore në Pejë, Lumturije Vuçetaj, si dhe të prokurores Arlinda Nallbani Gacaferi, ndërkohë që në krye të kësaj prokurorie është emëruar si ushtruese detyre Valbona Disha-Haxhosaj. Këto zhvillime kanë pasur epilogun e tyre gjatë një mbledhjeje të jashtëzakonshme të thirrur nga Këshilli Prokurorial i Kosovës (KPK), nën drejtimin e kryesuesit Arian Gashi, ku u shqyrtua kërkesa e parashtruar nga Kryeprokurori i Shtetit, Zejnulla Gashi, për nisjen e hetimeve disiplinore ndaj kryeprokurores Lumturije Vuçetaj dhe prokurores së çështjes, e cila shërben edhe si koordinatore për rastet e dhunës në familje, Arlinda Nallbani-Gacaferri. Pas shqyrtimit të imtësishëm të shkresave të dërguara nga autoriteti kompetent, trupa drejtuese e prokurorisë votoi pro themelimit të një paneli hetimor për këtë çështje, duke miratuar njëkohësisht edhe propozimin për suspendimin e përkohshëm të dy zyrtareve ndaj të cilave është hapur procedura disiplinore. “Vendimet e Këshillit Prokurorial të Kosovës, janë marrë në bazë të të gjeturave nga raporti me numër reference A.Nr. 379/2026, e të paraqitura në kërkesën për fillim të hetimit disiplinor nga Zyra e Kryeprokurorit të Shtetit, që ndërlidhet me rastin e vrasjes së A. Z.”, bëhet e ditur në kumtesë. Krahas masave ndëshkimore, Këshilli ka caktuar Valbona Disha-Haxhosaj në postin e Ushtrueses së Detyrës së Kryeprokurorit në Prokurorinë Themelore të Pejës, për të siguruar mbarëvajtjen e punës. Në fund të njoftimit zyrtar, KPK ka riafirmuar angazhimin e tij të palëkundur në përmbushjen e misionit kushtetues dhe ligjor, duke vënë në pah rëndësinë e llogaridhënies dhe ngritjes së integritetit institucional brenda sistemit prokurorial, gjithnjë në përputhje të plotë me ligjet në fuqi.