Kupa e Botës 2026 drejt rekordit historik: Pritet të arkëtohen rreth 5 miliardë dollarë vetëm nga biletat

Kupa e Botës 2026 pritet të thyejë çdo rekord historik financiar, pasi vetëm nga shitja e biletave FIFA synon të arkëtojë rreth 5 miliardë dollarë. Kjo shifër marramendëse është pesë herë më e lartë krahasuar me të ardhurat e siguruara nga edicioni i kaluar i zhvilluar në Katar në vitin 2022. Sipas të dhënave të bëra publike nga media britanike “The Times”, turneu i kaluar në Katar gjeneroi 929 milionë dollarë nga biletat. Ndërkohë, për ngjarjen e këtij viti që do të organizohet bashkërisht nga Shtetet e Bashkuara të Amerikës, Kanadaja dhe Meksika, parashikimet fillestare të shtëpisë më të madhe të futbollit botëror ishin rreth 3.3 miliardë dollarë. Në total, Kupa e Botës 2026 parashikohet të prodhojë rreth 15 miliardë dollarë të ardhura, duke u shndërruar në aktivitetin sportiv më fitimprurës ndonjëherë. Ky bum financiar vjen si pasojë e zgjerimit të formatit të kompeticionit nga 64 në 104 ndeshje, si dhe zbatimit të politikës së çmimeve dinamike për biletat nga ana e FIFA-s. Për më tepër, një tjetër burim i rëndësishëm fitimi është komisioni prej 30% që organizata ndërkombëtare përfiton nga rishitja e biletave nëpërmjet platformës së saj zyrtare. Ndonëse kjo qasje ka ngjallur kritika të shumta për shkak të tarifave të larta, FIFA e ka arsyetuar vendimin me faktin se ky sistem garanton kontroll mbi tregun dytësor dhe frenon abuzimet e tregtarëve të paautorizuar. Planet e organit drejtues të futbollit global parashikojnë që këto fonde të riinvestohen për mbarëvajtjen dhe zhvillimin e këtij sporti në shkallë globale. Sipas organizatës, paratë e grumbulluara do t'u vijnë në ndihmë 211 shoqatave anëtare, duke u krijuar atyre hapësira më të mëdha për përmirësimin e infrastrukturës sportive. Në këtë linjë, një zëdhënës i FIFA-s bëri të ditur se nga 6.81 milionë biletat e planifikuara për këtë ngjarje, mbi 100 mijë prej tyre do të dalin në shitje me çmimin simbolik prej 60 dollarësh, përfshirë këtu edhe biletat për ndeshjen e madhe finale. Krahas kësaj, është hedhur ideja e “Programit të Solidaritetit të Tepricave të FIFA-s”, përmes të cilit rezerva financiare do të përdoren për të dyfishuar fondet e destinuara për shoqatat anëtare gjatë harkut kohor 2027–2030, duke arritur një financim prej 6.35 miliardë dollarësh. Megjithatë, shifrat përfundimtare të arkëtimeve për Kupën e Botës 2026 mbeten ende për t'u zyrtarizuar. FIFA ka bërë të ditur se bilanci i saktë financiar do të publikohet në raportin e ardhshëm vjetor, menjëherë pas përmbylljes së të gjitha proceseve të auditimit.