Heroi i derbit, Erion Hoxhallari tregon emocionet pas golit ndaj ish-skuadrës dhe zbulon synimet e Dinamos

Mbrojtësi i Dinamos, Erion Hoxhallari, ka qenë protagonist absolut në sfidën e fundit derbi kundër Tiranës, e cila u mbyll me rezultatin e barabartë 1:1, ku ai realizoi golin vendimtar dhe u shpall zyrtarisht “Lojtari i Ndeshjes”. Në prononcimin e tij për mediat pas përfundimit të takimit, futbollisti nuk i fshehu emocionet e veçanta që përjetoi, duke u ndalur te përballja me klubin e tij të dikurshëm. “Të luash ndaj ish-ekipit, ku ke kaluar gjysmën e karrierës, është diçka e veçantë. Te Dinamo i di objektivat. Pas problemeve fizike, shpresoj të arrij formën më të mirë. Ende nuk jam 100%”, u shpreh ai. Më tej, Hoxhallari foli edhe për bashkëpunimin e tij me trajnerin Ilir Daja dhe ritmin e tij të ri të punës, duke theksuar se po jep maksimumin për t'u rikthyer plotësisht në formën më të mirë fizike. “Unë kam punuar edhe më parë me Ilir Dajën dhe i di manovrat e tij. Shpresoj që shumë shpejt të jem gati fizikisht dhe të jap më të mirën”, shtoi mbrojtësi. Në fund, lojtari komentoi edhe ambiciet e klubit blu, duke e cilësuar Dinamon si një skuadër me pretendime madhore dhe një ambient ideal për të zhvilluar punë cilësore. “Objektivi? Vetë fanela tregon se Dinamo futet për objektiva maksimalë. Edhe Dinamo është një ekip elitar. Këtu ambienti është më i qetë në krahasim me Tiranën, pra të lënë të punosh më i qetë”, përfundoi deklaratën e tij Hoxhallari.