Kuvendi i Kosovës miraton paketën ligjore për konfiskimin e pasurive të paligjshme

Legislativi i Kosovës ka kaluar përfundimisht në lexim të dytë Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Gjatë seancës plenare ku u hodh në votim ky projektligj, ai siguroi 66 vota pro, asnjë votë kundër, ndërsa shtatë ligjvënës vendosën të abstenojnë. Sa i përket qëndrimeve të subjekteve politike, mbështetje për këtë nismë ligjore ofruan deputetët e Aleancës, ndërsa ata të Lidhjes Demokratike të Kosovës (LDK) abstenuan gjatë procesit të votimit. Në krahun tjetër, përfaqësuesit e Partisë Demokratike të Kosovës (PDK) bojkotuan votimin, me përjashtim të deputetit Rrustem Mustafa, i cili bëri përjashtim duke dhënë votën e tij pro projektligjit.