Chivu pas triumfit ndaj Venecias: Në pjesën e parë do të ndryshoja dhjetë lojtarë

Pavarësisht fitores së regjistruar në transfertën ndaj Venecias, trajneri i Interit, Cristian Chivu, nuk ka ngurruar të shprehë pakënaqësinë e tij për paraqitjen e skuadrës, veçanërisht gjatë 45-minutëshit të parë të sfidës. “Kishim pak energji dhe ishim të ngadaltë në disa veprime, por kjo është diçka që ndodh kur luan çdo tri ditë. E fituar ndeshjen, por patëm fat”, – u shpreh ai pas përfundimit të takimit. Teknieri zikaltër theksoi se skuadra duhet të rikuperojë forcat në prag të sfidës derbi, ndërsa pranoi hapur se ishte pranë një revolucioni të plotë në formacion gjatë intervalit të pushimit. “Do të mbërrijmë në derbi me 25 pikë dhe me gjendjen që kemi aktualisht. Na duhet të rikuperojmë energjitë, sidomos ato mendore. Në pushim më duhej të zëvendësoja disa lojtarë për të dhënë një impuls të ri. Do të kisha ndryshuar 10 lojtarë, duke lënë në fushë vetëm Provedel”, – shtoi ai. Gjatë prononcimit të tij, Chivu doli në mbrojtje të lojtarit Stankovic, duke kërkuar që të mos ketë shënjestrim të padrejtë individual. “Nuk është e drejtë ta kritikojmë veçmas. Ai bëri atë që bëri e gjithë skuadra”, – u shpreh trajneri, i cili komentoi edhe situatën e Carlos Augustos, duke zbuluar se braziliani kishte shqetësime me stomakun, por pavarësisht kësaj, dha kontribut të çmuar në aspektin e energjisë, forcës, shpejtësisë, golave dhe asisteve. Duke analizuar ecurinë e përgjithshme, tekniku vuri theksin te nevoja për vazhdimësi dhe rritje profesionale. “Duhet dhe mund të përmirësohemi. Vendosmëria nuk duhet të na mungojë kurrë. Kam një grup që punon dhe beson. Sezonet janë të gjata dhe ajo që ke bërë një vit më parë shpesh nuk ka rëndësi”, – përfundoi ai. Në konferencën për shtyp pas ndeshjes, Chivu përmbylli me një batutë lidhur me të ardhmen e afërt: “Ruaj rezultatin, sepse shumë skuadra po vuajnë duke luajtur çdo tri ditë. Për derbin asgjë nuk është vendosur. E vetmja gjë e sigurt është se unë do të jem në stol”.