Tragjedia e Arlinda Zekajt: Togeri Faruk Muçolli refuzon të përgjigjet pas publikimit të përgjimeve ku ajo i kërkonte ndihmë

Togeri i Policisë së Kosovës në Pejë, Faruk Muçolli, ka shmangur çdo përgjigje për opinionin publik lidhur me ngjarjen e rëndë të vrasjes së Arlinda Zekajt, një grua e cila kishte kërkuar mbrojtje nga organet e rendit para se të humbte jetën tragjikisht. Skandali ka dalë në dritë pas transmetimit të audio-incizimeve në emisionin “MAT”, të cilat dokumentojnë kontaktin e drejtpërdrejtë ndërmjet viktimës dhe togerit Muçolli pak ditë para krimit. Nga bisedat e zbardhura kuptohet se Arlinda Zekaj i ishte drejtuar institucionit policor me kërkesën urgjente për ekzekutimin e urdhrit të mbrojtjes ndaj ish-bashkëshortit të saj, duke shprehur gjithashtu frikën dhe shqetësimin e thellë për sigurinë e djalit të saj. Pavarësisht thirrjes për ndihmë, transkriptet tregojnë se zyrtari policor i ishte përgjigjur se nuk kishte detyrim ligjor të merrej me rastin e saj. I kontaktuar lidhur me ndjenjat e tij pas kësaj tragjedie dhe përfshirjen e tij në komunikimin ku viktima lypte mbrojtje, toeri Muçolli ka prerë shkurt çdo mundësi komunikimi, duke u arsyetuar me ngarkesë në punë dhe mungesë autorizimi për të folur para gazetarëve. “E nderuar, dëgjo. Jam shumë i nxënë me punë dhe definitivisht nuk e kam as kohën e as pozicionin për t’u prononcuar për media. Mund të drejtoheni te zyra e mediave. Po të njoftoj se je duke më penguar dhe nuk kam të drejtë të prononcohem unë lidhur me këtë çështje. A mundesh me më kuptu shumë mirë? Nuk kam të drejtë të prononcohem”, është shprehur Muçolli.