Tragjedia në Athinë: Zbardhen detajet e para mbi shkaqet e shpërthimit që i mori jetën të rinjve shqiptarë

Familjarët e viktimave të shpërthimit tragjik që tronditi të premten zonën e Plakës në Greqi kanë mbërritur në kryeqytetin grek, ndërkohë që institucionet kompetente po vijojnë procedurat e duhura për identifikimin dhe dorëzimin e trupave. Ngjarja e rëndë u regjistrua në një objekt në zonën e Plakës, ku forca e shpërthimit solli shembjen totale të ndërtesës dhe fatkeqësisht i kushtoi jetën disa personave, mes të cilëve edhe të rinjve shqiptarë. Sipas informacioneve nga mediat helene, grupi hetimor po shqyrton si pistë kryesore mundësinë e një rrjedhjeje gazi. Megjithëse është folur në rrugë jozyrtare për një erë të pazakontë të ndjeprerë para shpërthimit, deri në orët e vona të mbrëmjes së djeshme, asnjë nga dëshmitarët e pyetur nga policia nuk e kishte përmendur këtë detaj në dëshmitë e tyre zyrtare. Në vlerësimin paraprak të ngjarjes, Policia e Greqisë ka hedhur poshtë mundësinë që ngjarja tragjike të jetë pasojë e ndonjë akti kriminal. Ndërkaq, procesi hetimor mbetet i hapur për të zbuluar shkaqet e sakta të katastrofës. Ekspertët po kryejnë analiza të hollësishme të provave në terren dhe po vlerësojnë çdo rrethanë të mundshme që mund të ketë çuar në këtë ngjarje tronditëse. Të afërmit e viktimave janë në pritje të përmbylljes së procedurave të identifikimit, ndërsa autoritetet hetimore paralajmërojnë se do të dalin me konkluzione zyrtare sapo të përfundojë ekspertiza e plotë e vendit të ngjarjes.