Prishtina ngrihet sërish sot në protestë kombëtare: Kërkohet drejtësi për Arlindën dhe mbrojtje për gratë

Sheshi “Zahir Pajaziti” në kryeqytet do të shërbejë edhe sot si vatër e revoltës qytetare, ku në orën 16:00 do të rinisë protesta kombëtare e organizuar nga Kolektivi për Mendim dhe Veprim Feminist. Përmes këtij njoftimi, organizatorët u kanë bërë apel të gjithë qytetarëve që t'i bashkohen marshit për të kërkuar vendosjen e drejtësisë për rastin e Arlindës, si dhe për të gjitha gratë e tjera që kanë rënë viktimë e dhunës fatale. Aktivistët kanë bërë me dije se veprimet e tyre nuk do të ndalen me kaq. Ata kanë paralajmëruar vazhdimësi të protestave dhe bllokim të punës së institucioneve përgjegjëse derisa të plotësohen të gjitha kërkesat e parashtruara. “Kërkojmë organizim e solidarizim kombëtar. Për siguri e liri për gratë e gjalla, e drejtësi për gratë e vrara”, theksohet në thirrjen zyrtare të Kolektivit për Mendim dhe Veprim Feminist.