Zbardhen audio-përgjimet e tragjedisë hekurudhore në Spanjë: Kontrollori dha dritën jeshile pa verifikuar distancën e sigurisë

Katastrofa hekurudhore në Spanjë, e cila ka lënë pas 68 viktima deri në këto momente, mund të jetë paraprirë nga shkelje të rënda proceduriale. Tri regjistrime audio të siguruara nga bisedat mes qendrës së kontrollit dhe drejtuesve të trenave Iryo dhe AVE po hedhin dritë mbi rrethanat e ngjarjes dhe po ngrenë pikëpyetje serioze mbi mënyrën se the u menaxhuan protokollet e sigurisë para përplasjes. Sipas dokumentacionit audio, dyshohet se zyrtari i qendrës së kontrollit ka urdhëruar rifillimin e qarkullimit me shpejtësi të rregullt pa u siguruar më parë nëse hapësira mes mjeteve ishte brenda parametrave të lejueshëm. Ky veprim po analizohet me lupë nga hetuesit si një nga shkaqet kyçe që çuan drejt fatkeqësisë. Në një prej audioregjistrimeve, qendra e kontrollit në Atocha i jep udhëzim drejtuesit të trenit AVE që të vijojë udhëtimin normalisht, pavarësisht faktit se nuk kishte asnjë konfirmim zyrtar se garnitura Iryo që ndodhej përpara ishte larguar në një distancë që garantonte sigurinë. Dialogu i konfirmimit mes palëve u zhvillua në këtë formë: Qendra e Kontrollit Atocha (CRC): “Shkëputeni dhe rilidhni LZB-në. Përsëriteni itinerarin. Dhe pastaj përsëriteni itinerarin nën mbrojtjen e BSL-së me një itinerar normal.” Makinisti i trenit AVE: “Me orar të rregullt?” Qendra e Kontrollit Atocha (CRC): “Po.” Pavarësisht kësaj, ky urdhër u lëshua në terr informativ sa i përket pozicionit të saktë të trenit Iryo, duke rritur rrezikun e një incidenti fatal. Përgjimet e tjera përfshijnë edhe komunikimin e orës 08:41 mes drejtuesit të trenit Iryo dhe operatorëve, ku ky i fundit lajmëron për një avari teknike që pengonte lëvizjen. Makinisti i Iryos: “Mirëmëngjes, Atocha. Pata një problem me kutinë e shpejtësisë ndërsa ngisja me BZL. Treni tjetër duhet të jetë në autostradën 113 me mbi 200 km/orë. Por nuk kam bërë asnjë ndërrim shpejtësie. Jam ndaluar në hyrje të Urda-s.” Pas shkëmbimit të mesazheve, kontrollori përsërit kërkesën për rikthim në qarkullim: Qendra e Kontrollit Atocha (CRC): “Shkëputeni. Dhe rilidhuni. Rifilloni udhëtimin tuaj, nën mbrojtjen e BSL-së, me shpejtësi normale.” Makinisti i trenit Iryo: “Në rregull, më jep një moment.” Në një thirrje pasardhëse, makinisti raporton se mjeti vazhdonte të ishte i bllokuar për shkak të pamundësisë për të komanduar sistemin LZB. Makinisti i Iryos: “Treni nuk më lejon të kontrolloj sistemin LZB. Kjo është arsyeja pse jam ende i ndaluar në sinjalin e hyrjes.” Qendra e Kontrollit Atocha (CRC): “Në rregull, atëherë, sa më shpejt të jetë e mundur. Dhe nëse keni ndonjë problem, thjesht na telefononi.” Makinisti i trenit Iryo: “Në rregull, perfekt.” Materialet audio përfshijnë gjithashtu diskutime të brendshme të stafit në sallën e kontrollit, ku analizoheshin difektet teknike dhe strategjia se si duhet të veprohej për zhbllokimin e trafikut hekurudhor. Vetëm pesë minuta pas këtij shkëmbimi informacionesh, u regjistrua përplasja fatale mes dy mjeteve, Iryo dhe AVE. Autoritetet kompetente vijojnë hetimet e thelluara për të përcaktuar me saktësi nëse dështimi në zinxhirin e komunikimit dhe mosrespektimi i rregullave të qarkullimit ishin faktorët vendimtarë që shkaktuan tragjedinë.