Sllovenia drejt ndalimit të mbulimit të fytyrës në hapësirat publike

Qeveria e Sllovenisë ka nisur procedurat për ndryshimin e Ligjit për Mbrojtjen e Rendit dhe Qetësisë Publike, duke parashikuar ndalimin e mbulimit të fytyrës në vende publike. Ky vendim synon të kufizojë çdo formë mbulese që pengon identifikimin e tipareve të fytyrës, me qëllim që t'i lehtësojë punën policisë në proceset e identifikimit të individëve. Sipas draft-propozimit, ky rregullim nuk do të jetë i gjithëpërfshirshëm. Janë parashikuar përjashtime specifike për rastet kur mbulimi i fytyrës është i domosdoshëm për arsye shëndetësore ose profesionale. Po ashtu, ndalimi nuk do të prekë aktivitetet sportive, ngjarjet artistike, kulturore apo ato tradicionale, si dhe veshjet apo simbolet që lidhen me rrethana të tjera personale të lejuara. Çdo person që shkel këto dispozita të reja ligjore, nëse ato miratohen, do të përballet me gjoba administrative që variojnë nga 100 deri në 200 euro. Nisma për këto ndryshime erdhi pas kërkesës së partisë së koalicionit “Istina” (Resni.ca) për mbajtjen e një referendumi popullor mbi këtë çështje. Gjatë debatit parlamentar, përfaqësuesit e grupeve politike nënvizuan se fokusi i këtij kufizimi qëndron tek burka, duke argumentuar se një masë e tillë është e nevojshme për të mbrojtur identitetin dhe mënyrën e jetesës sllovene përballë fluksit të emigrantëve, të cilëve u kërkohet një përshtatje më e madhe me vlerat e vendit pritës. Me këtë nismë, Sllovenia pritet t'i bashkohet një liste të gjatë shtetesh evropiane që kanë aplikuar kufizime të ngjashme. Aktualisht, vende si Franca, Belgjika, Austria, Danimarka, Zvicra, Bullgaria dhe Portugalia kanë ndaluar plotësisht mbulimin e fytyrës, ndërsa shtete si Holanda, Luksemburgu dhe Letonia e kanë kufizuar këtë praktikë vetëm në institucione të caktuara shtetërore, shëndetësore apo arsimore. Për më tepër, në Itali dhe Gjermani, ndalesa të tilla janë implementuar në nivel provincial.