Tronditje në futbollin gjerman: Ndahet nga jeta në moshën 24-vjeçare trajneri i Arminia Bielefeld, Nico Baumker

Klubi gjerman Arminia Bielefeld është përfshirë nga pikëllimi i thellë pas ndarjes së parakohshme nga jeta të trajnerit të grupmoshës U11, Nico Baumker, i cili u shua në moshën vetëm 24-vjeçare. Sipas raportimeve të mediave gjermane, klubi që militon në divizionin e dytë të futbollit në Gjermani konfirmoi të hënën se strategu i ri ka ndërruar jetë pas një komplikimi shëndetësor të papritur, që lidhet me një gjendje të mëparshme mjekësore. Përmes një njoftimi zyrtar, drejtuesit e klubit theksuan se janë thellësisht të tronditur nga kjo ngjarje tragjike, ndërkohë që nuk janë dhënë detaje shtesë mbi natyrën e saktë të urgjencës mjekësore apo sëmundjes që i mori jetën të riut. Nico Baumker kishte një lidhje të hershme dhe të fortë me klubin e Arminia Bielefeld, pasi më parë kishte mbajtur edhe fanellën e tij si lojtar. Ai ishte aktivizuar në ekipet e grupmoshave të reja, nga U13 deri te U17, mirëpo një dëmtim i rëndë e detyroi ta mbyllë para kohe rrugëtimin e tij në fushën e blertë. Pavarësisht kësaj kthese, pasioni i tij për futbollin mbeti i pandryshuar. Në vitin 2020, Baumker u bë trajneri më i ri në akademinë e klubit, e njohur si Akademinia, për të marrë më pas drejtimin e skuadrës U11.