Thirrje për drejtësi në Deçan: Qytetarët protestojnë fuqishëm pas vrasjes tragjike të Arlinda Zekajt

Sheshi qendror i Deçanit është bërë sot arena e një tubimi protestues, ku dhjetëra gra dhe vajza janë mbledhur për të ngritur zërin kundër dhunës me fatalitet, pas vrasjes tronditëse të 49-vjeçares Arlinda Zekaj, e cila u privua nga jeta në mënyrë mizore nga vëllai i ish-bashkëshortit të saj. Gjatë kësaj proteste paqësore, pjesëmarrëset kanë shpalosur fotografi të viktimës, si dhe pankarta të shumta me mesazhe të fuqishme që kërkojnë masa urgjente për mbrojtjen e jetës së grave në shoqëri. Mes thirrjeve të ndryshme sensibilizuese, një vëmendje të veçantë ka tërhequr ajo e mbajtur në duar nga një vajzë e vogël, ku shkruhej: “Fëmijët e kanë vendin pranë nënës. Jo nesër të qajnë mbi varrin e saj”. Në këtë tubim solidarizues dhe protestues për sigurinë e gjinisë femërore kanë qenë të pranishëm edhe kryetari i Komunës së Deçanit, Bashkim Ramosaj, së bashku me bashkëshorten e tij.