Skandali me drejtësinë: Jeton Sylaj dyshohet se ka katër dosje penale të hapura vetëm për vitin 2026

Bazuar në dokumentin e Gjykatës Themelore në Pejë për caktimin e paraburgimit ndaj Jeton Sylajt – ish-bashkëshortit të Arlinda Zekajt, i cili dyshohet për veprën penale të mospërfilljes së gjykatës –, rezulton se i pandehuri ka disa çështje të tilla aktive në sistemin e drejtësisë. Gjatë seancës dëgjimore për vendosjen e masës së sigurisë, prokurori Argzon Hasi ka bërë të ditur se në ngarkim të të pandehurit figurojnë gjithsej gjashtë raste të hapura penale, prej të cilave katër syresh i takojnë vitit 2026. Përballë kësaj situate dhe numrit të lartë të lëndëve aktive, organet e ndjekjes kanë ngritur shqetësimin se lënia e tij në liri mund të favorizojë rrezikun e arratisjes, duke iu shmangur kështu llogaridhënies para ligjit.