Gavi kërkon hapësira te Barcelona: Mesfushori synon të fitojë besimin e Hansi Flick pas mungesës në El Clasico

Gavi është i vendosur të rikthehet fuqishëm në planet e trajnerit Hansi Flick, pasi deri në këtë fazë të sezonit ka regjistruar minuta mjaft të pakta me fanellën e Barcelonës. Futbollisti 21-vjeçar ka zbritur në fushë për vetëm 191 minuta në shtatë sfida zyrtare, ndërsa situata e tij u vu në pah edhe më shumë në humbjen e fundit ndaj Real Madridit, ku mbeti në stol pa u aktivizuar fare. Edhe pse edicioni nisi në mënyrë pozitive me një vend titullari në triumfin 5-0 ndaj Elches, një dëmtim në gjurin e djathtë ndërpreu hovin e tij, duke e detyruar të qëndrojë larg fushave për disa takime. Pas rikuperimit, aktivizimi i tij ka qenë i matur, me përjashtim të një mundësie nga minuta e parë që trajnerit gjerman ia besoi në ndeshjen kundër Getafes. Një nga paraqitjet më mbresëlënëse të mesfushorit u regjistrua ndaj Paris Saint-Germainit. I futur në pjesën e dytë, Gavi i solli skuadrës një dinamizëm dhe agresivitet të spikatur në mesfushë, madje duke i shkuar shumë pranë golit pas një bashkëpunimi me Lamine Yamal, para se portieri Matvei Safonov të ndalte gjuajtjen e tij. Pavarësisht humbjes 4-2 në tokën franceze, shfaqja e tij solli optimizëm. Për këtë arsye, lënia e tij jashtë planeve në El Clasico ngriti mjaft dilema. Katalanasit vuajtën ritmin e lartë të rivalëve madrilenë, ndërkohë që Flick kreu vetëm katër zëvendësime, duke e lënë Gavit, të njohur për grintën dhe angazhimin e tij maksimal, të ndiqte të gjithë sfidën nga pankina. Megjithatë, talenti i ri nuk ka ndërmend të dorëzohet përballë kësaj sfide. Menjëherë pas disfatës në El Clasico, ai shprehu hapur mbështetjen për bashkëlojtarët e tij, duke konfirmuar përkushtimin e palëkundur ndaj ngjyrave të klubit pavarësisht hapësirave të reduktuara. Konkurrenca e ashpër në repartin e mesfushës kërkon që Gavi të shfrytëzojë çdo shans të dhënë për të bindur teknikun Flick. Në rast se minutazhi i tij mbetet i ulët, mundësia e shfaqjes së interesimit nga klube të tjera gjatë afatit kalimtar të janarit mbetet një situatë për t’u vëmendur.